Guwahati, Risaw 2: U Myntri Rangbah ka Assam Himanta Biswa Sarma ula ong ba ka BJP kam donkam satia ia ka vote jong ki ‘Miya’ jong ki jaka them ha kine ki 10 snem ban wan ban iakhun elekshon.
U Sarma ula kren ia kane hynnin ka snggi U Blei bad ong ba ka BJP kam donkam ia ka vote ki Miya katba kim pat pynkylla ialade da kaba iehnoh ia ki jingleh tynrai ba ju leh kum ka jingpyniashongkha khynnah.
Ula ong ba watla ki Miya ki kyrshan ia u, u Myntri Rangbah Duh bad ka BJP, hynrei ki lah ban iai bteng ha kaban iapyrta slogan na ka bynta ka BJP khlem da donkam ban ai vote ia ki.
“Ka BJP kan leh ia ki kam bhalang u paidbah bad kin kyrshan ia ngi, hynrei ngim donkam ia ka vote jong ki. Kam don jingma ban vote ia ngi. Ai ba kin hylla ‘Zindabad’ ia u Himanta Biswa Sarma, Narendra Modi bad BJP” ula ong haba jubab ia ka jingkylli ki nongthoh khubor.
Lah ban kdew ba ia ka kyntien Miya la ju pyndonkam haba niew ia ki Bengali kiba kren Muslim.
U Himanta ula ong “Ynda wan ka elekshon, nga dalade ngan kyrpad ia ki ban nym vote ia ngi. Ynda phi la iabud ia ka jingpynduna khun, sangeh ka shongkha khynnah bad iehnoh ia ki kam lehnoh, hangta phin sa lah ban vote ia ngi”.
“Ban pyndep ia kane, kan shimpor 10 snem. Ngin sa pan vote hadien 10 snem, ym mynta”.
