Guwahati, Jylliew 23 : Ka jingshlei um ha Assam kala ktah mynta ia kumba 5 lak ki nongshongshnong ha ki 12 tylli ki District bad uwei u briew ula iap na ka jingshah rong ha ka umsaw ha Udalguri District.
Kat kum ka jingpyntip ka ASDMA, haduh 4,95,799 ngut ki briew kila hap ban kynriah jaka sah bad u briew uba iap ua dei na Tamulpur, Assam.
Kine ki 4,95,799 ngut ki dei kiba na ka District Baksa, Barpeta, Chirang, Darrang, Dhubri, Dibrugarh, Kamrup, Kokrajhar, Lakhimpur, Nalbari, Sonitpur bad Udalguri districts.
Ka Barpeta ka dei kaba shah ktah jur eh ha kaba palat 3,25,600 ngut ki briew kila hap ban kynriah jaka bad la bud s aka Nalbari kaba kot 77,700 bad ka Lakhimpur kaba kot 25,700. Tad haduh ka sngi Balang, kumba 1.2 laj ngut ki briew kila shah ktaha ka jingshlei um ha ki 10 tylli ki District ka Assam.
Ki bor District kila buh mynta haduh 83 tylli ki jaka sah ba shipor ha ki 7 tylli ki district ha kaba haduh 14,035 ngut ki briew kila shong riehtngen nalor ki 79 tylli ki jaka sam marbam kiba la buh ha ki phra tylli ki District.
Kat haduh mynta haduh 1366 tylli ki Shnong kila ngam shapoh um bad 14,091.90 hectar ki jaka rep kila shah pynjulor.
Kane ka jingshlei um kala rong noh ruh ia bun ki jaka puta kiba don harud wah ha kylleng ki district ka Jylla kiba kynthup ia ka Sonitpur, Bongaigaon, Darrang, Dhubri, Lakhimpur, Morigaon, Nalbari, South Salmara bad Udalguri,.
Ka Wah Brahmaputra ha Dhubri bad Neamatighat nalor ki wah Beki ha Manam bad Pagladiya bad Puthimari kala kiew ha u dak ka jingma.
Pule ruh: Shong jingialang u CM bad ka MoRD ban bishar ia ka jingtreikam ki skhim ha Jylla
