Guwahati, Rymphang 22: Ki Pulit ka Assam kila pynlong ia ka jingkhynra pyrshah ia ki nongairam pisa ha baroh kawei ka Jylla bad kem haduh 122 ngut namar ka jingkhein beain ia kane ka kam ba ki leh.
Haba thoh ha X, u Myntri Rangbah ka Assam Himanta Biswa Sarma ula ong ba ki Pulit kila kurup ia ka pisa, ia ki soskular airam, ki jingdeng ksiar bad ki pata bala buh lilam bad ki kot ki sla ka Bank.
Haba pynthikna ba ki Pulit kin long ka stieh ia ki briew ba lah ban ngat ha kine ki nongairam shukor, u Myntri Rangbah ula ong “Ha ka jingkhynra ha baroh kawei ka Jylla ia ki nongairem, ngi la kem haduh 122 ngut. Ki Pulit kila kurup ia ka pisa, ki soskular airam, ki jingdeng ksiar bad ki pata bala buh lilam bad ki kot ki sla ka Bank. Ngi la kut jingmut ban bteng ia ka sienjam ha kaban long ka stieh ia ki briew ba duna ka jingioh naka kti kine ki nongairam aishah ba beain”.
Dang ha ka miet 18 tarik, ki Pulit kila kem ia 2 ngut ki nongairam halor ka jingkynnoh ba ki airam beain hapoh Chirang District ka Assam.
