Imphal, Rymphang 22: Ban pyrshah ia ka jingkynnoh leh tohmet jong ki bor pahara pyrshah ia ki kynthei kiba iakhih, ki nongiasaid ain ka Manipur ha ka sngi Balang, kila pynlong ia ka jingiakhih hakhmat ka Cheirap Court Complex kaba don ha Imphal West District ka Manipur.
Hadien ka jingialang ba kyrkieh bala pynlong da ka All Manipur Bar Association (AMBA) bad ka High Court Bar Association (HCBA), ki nongiasaid ain kila shim ia ka rai ban pynlong ia ka jingiakhih da kaba shong kyllain mungor.
Ki bor pahara Rapid Action Force (RAF) la kynnoh ba kila siat tyndong lyer pynsat khmat hapoh ka Cheirap Court Complex sha ki longkmie kiba ialum paidbah bad iakhih pyrshah ia ka jingshah kem ki 6 ngut ki briew na ka jingkulmar bad jinglute tiar siat na ki bor pahara kaba jia ha ka 13 tarik Rymphang ha Imphal East District.
U President ka AMBA Puyam Tomcha ula ong ba baroh artylli ki Bar Association kila pynrem ia ka jingleh tohmet jong ki bor pahara RAF pyrshah ia ki kynthei kiba pynlong ia ka jingiakhih.
