Guwahati, Naitung 06 : Ka Central Bureau of Investigation (CBI) ha ka sngi Nyngkong, kala pynlong ia ka jingkhynra ha kylleng ki jaka ha Assam, Arunachal Pradesh bad Nagaland kum shibynta na ka jingiakhun hapoh ka ri baroh kawei ban kyndang ia ka jingkynnoh bamsap hapoh ka Border Roads Organisation (BRO).
Ia ka jingkhynra la pynlong ha ki 26 tylli ki jaka ha ki 11 tylli ki Jylla bad Union Territories ba iadei bad ki saw tylli ki kam bymman ba don bynta ka jingbamsap na ki project ka BRO.
Kat kum ka jingong ka CBI, kane ka case ka mih na ka jingkynnoh ba thungkam bym hok ia ki nongtrei casual bad jingsiew bym dei rukom bala ai ha ka kyrteng jong ki nongbylla thok hapoh ka project Vijayak bad Project Yojah ha Ladakh.
Ia ka ejahar la register hadien ka jingujor da ka Ministry of Defence, kaba la pynshong nongrim naka jingtohkit hapoh iing bala khlieh da ka Technical Board of Officers ka BRO.
Ka Agency ka ong ba ka jingtohkit kala lap ia ki jingkynnoh kam bymman kynthup ka jingbamklop ia ka pisa ka Sorkar, ka jingleh thok, soi kyrteng thok, ka jingsuhbuit kam bymman, ka jingpynbam pisa bad kiwei kiwei.
Haduh 10 ngut ki Ophisar ka BRO, kynthup kiba bat ia ka kyrdan Lieutenant Colonel, Major bad Engineer, nalor ki riew shimet, kila shah jer kyrteng ha ka ejahar.
Ka CBI ka iathuh ba ka jingkhynra kala lam sha ka jingioh kurup ia ki kot ki sla kiba donkam bad ki sakhi digital, haba pyntip ba ka jingtohkit mynta ka dang iaid shaid shaid.
 ha ka sngi Nyngkong, kala pynlong ia ka jingkhynra ha kylleng ki jaka ha Assam, Arunachal Pradesh bad Nagaland kum shibynta na ka jingiakhun hapoh ka ri baroh kawei ban kyndang ia ka jingkynnoh bamsap hapoh ka Border Roads Organisation (BRO).){kind=link}