Dibrugarh, Naitung 22: Ka jingnang twa jong ki khyndew harud ka wah Brahmaputra ha Maijan, Dibrugarh, kaba don markhap bad ka CM Secretariat, kala pynmih ka jingkhuslai kaba jur hapdeng ki paidbah nongshong shnong ka thain.
“Ka jingtwa khyndew ba thymmai hynnin ka miet sngi nyngkong, kaba la iar kumba 15 phut na ka jingshah rong ha ka Wah, kala pynduh thiah ia ngi baroh shimiet” ong u wei na ki nongshong shnong.
Ula ong, “Man u snem ka wah Brahmaputra kala rong ia ki jaka kynthup ki jaka rep ki jaka riang kiba heh bha, hynrei sngewsih ba ym shym la don mano mano ruh ban shimkhia ia kane ka jingma”.
Ban jubab halor kane, ki bor pyniaid district kila mih shakhmat ban thaw ia ki lad ki lynti ban iakhun pyrshah ia kane ka jingtwa khyndew. Ki ophisar na ka tnad Water Resources Department kila jurip ia katei ka jaka bad kila sdang ia ki lad jingiarap ba shipor ban khang lad iaka jingshah pynjulor.
“Ha kiba bun ki jaka, la pyndonkam shipor da ki geo-bags hynrei kila shah rong noh ha ki bor ba khlain jong ka Wah. Halor kane la donkam kyrkieh ia ki lad jingiada ban neh shirta” ong sa u wei na ki nongshong shnong ka Dibrugarh.
Lah ban kdew ba na ka jingwan u jumai ba (8.7 magnitude) ha ka 15 tarik u bnai Nailar ha u snem 1950 kala wanrah ia ka jingkylla ba bun ha ka jingiaid lynti jong ka Wah Brahmaputra. Ka jingwan u jumai kala pynkiew ruh ia ka um kaba don hajan Dibrugarh da ki katto katne meter.
