Guwahati, Nailar 09: U Myntri Rangbah ka Jylla Assam Himanta Biswa Sarma ha ka sngi Ba-ar, ula khot ia u Commander –in-Chief ka United Liberation Front of Asom –Independent, Parish Baruah ba kin wan bad sah ha Assam tang shi taiew bad ban peit ia ki jingkylla hapoh ka Jylla.
Haba iakren bad ki nongthoh khubor, u Himanta ula ong “Ha ka por ba u Baruah ula mih na Assam u don ia ka jingsngew ba ki paidbah nabar Jylla kila knieh ia ka Assam hynrei mynta ki paidbah ka Assam kila trei ha Karnataka bad Andhra Pradesh. Ka jinglong jingman kala kylla. Kam dei shuh kumba ju long ha u 1982 bad 1983”.
“Wan kum u Nongshah khot sngewbha haduh 7-10 sngi ha Assam. Kane kan sa kylla shisien ba ula wan bad sah hangne. Kiba bun ki samla kila leit pyniasoh sha ka ULFA bad kila wanphai pat bad bun ruh kila aiktien sha ki bor Sorkar ban iarap ia ki ba kin lah wanrah noh namar ka jinglong jingman ha Myanmar kala nang sniew nang sniew” ong u Himanta.
U Myntri Rangbah ula ong “Kam dei shuh kajuh ka Assam kum ha ka por ba thaw ia ka ULFA. Ka Jylla kala iaid sted bha shakhmat ha ka lynti jong ka roi ka par. Kala don ruh ka jingkylla ha ka jingmut jingpyrkhat ki paidbah. Ka ULFA (I) ka don ha ka mawmer ba khatduh sha ka lynti jong ka jingiasuk. Nga ngeit skhem ba kin sa lah ban wanphai noh shen”.
U Himanta ula ong ba shisien ba kane ka kynhun khein beain ULFA-I ka wan noh sha ka jingiakren bad ka Sorkar, ka Assam kan sa kylla long ka dewlynnong jong ka jingsuk.
Hadien ba u Himanta Biswa Sarma ula bam smai kum u Myntri Rangbah ka Assam, ula kyrpad ia u Paresh Barauh ban wanphai noh sha ka kam sain hima sima ka jylla.
Shuwa ka jingrakhe ia ka sngi Laitluid ka Ri, ka Jylla kala pynkhlain ia ki bor pahara ban tehlakam ia kano kano ka jingthmu ban leh ia ki kam pyntriem hapoh ka Jylla.
Ha une u snem, ka Sorkar Jylla kala pynlong ia ki prokram bapher bapher naduh ka 8 tarik Nailar ban pynlong kyrpang ia ka jingrakhe Sngi Laitluid ban ia ki snem bala leit noh.
