Manipur : Kynthoh tyngeh ka Supreme Court ba pheil ka Tnad Pulit haba bishar ia ki kaiphod halor ki ejahar

Imphal, Nailar 09 : Ka Iingkashari Supreme Court ha ka sngi Ba-ar kala ong ba ka kaiphod bala aiti da ka Sorkar Jylla halor ki 6,523 tylli ki ejahar kala kdew ia ka jingbym treikam eiei ka Tnad Pulit ha ka Jylla naduh ba khie ka thma iapher Jaidbynriew ha u bnai Jymmang.

Ha ka 7 tarik Nailar, u Director Generel of Police (DGP) ka Manipur ula hap ban leit mihkhmat hi dalade hapoh ka Iingkashari Supreme Court ban ai jubab ia ki jingkylli jong ka Iingkashari.

“Kane ka pyni ba naduh ba sdang jong u Jymmang haduh ba kut u Naitung, kala don ka jingbym treikam eiei jong ki bor ka riti synshar. Kam don ain shuh ha ka Jylla, ka jingbym don shuh ka shongsuk shongsain. Lada ka ain kam lah ban iada ia ki nongshongshnong, hangno ba ngin don mangi?” ong u Chief Justice ka Inddia DY Chandrachud, haba kylli ia ka Sorkar Manipur bala mihkhmat da u Solicitor General Tushar Mehta.

Ha ka hukum, ka Iingkashari kala ong ba ka jingtohkit jong ki Pulit ia kine ki ejahar ka dei kaba la shu pynslem kai. Ka kam kala shu slem shabar palat naduh ba jia ka jingjia bad ka jingresgiter ia ka ejahar bad ka jingshim ia ki sakhi satar bad ka jingkem ia ki briew.

Ka Iingkashari ka ong ba ka jingkit ban tohkit ia palat 6500 tylli ki case ka lah ban buh ia ka CBI ha ka jingbym lah ban treikam bha.

Pule ruh: Tripura : Pynbna ka ECI ia ka elekshon shiteng samoi, yn thep vote ha ka 5 tarik Nailur