Guwahati, Jymmang 28 : U Deputy Commissioner ka Majuli Cavery B Sarma ula hukum ban pynlong ia ka jingtohkit ia ka jingkynnoh uwei u Nonghikai ka skul ha Majuli, ula khap jubor ia ki sniuh khlieh jong palat 30 ngut ki Khynnah skul.
U Deputy Commissioner ula hukum ia kane ka jingtohkit ha ka sngi Thohdieng bad bthah ruh ba dei ban aiti mar mar ia ka kaiphod sha u.
Ki bor pyniaid skul ha ka jingtohkit jong ki bor ba halor, kila pynpaw ba ki khynnah skul kila ieh jrong sniuh, ia kaba ka skul kam shym la shah satia kat kum ki kyndon pyniaid skul.
Une u Nonghikai u kyrteng u Nicky bad ula leh ia kane ka kam halor ka jingbthah jong ki bor skul. Hynre hadien kane ka jingjia, ki Khynnah skul kila kyntait ban leit shong klas, ong ki Kmie Kpa jong ki Khynnah.
Ki bor District kila ong ba kam shym don satia kano kano ka kyndon treikam ha ka Sorkar ha kaba u Nonghikai u lah ban khap ia ki sniuh jong ki khynnah hapoh skul.
“Ki don kiwei pat ki lynti ban pynbeit ia ki Khynnah. Ngi pynlong ia ka jingtohkit ban sngewthuh ia kaei kaba jia ha katei ka sngi” kila ong.
