Guwahati, K’Lyngkot 20: Hadien ka jingjia iaumsnam kaba la ktah ia shongsuk shongsain ha Kokrajhar district, ka sorkar ha ka sngi ba-ar kala khang noh shwa ia ka mobile internet ha Chirang District kaba dei ka district ba marjan ban iada na ka jingpur shuh shuh ka jingiakynad.
Ia kane ka order la pynmih hapoh ki kyndon jong ka Indian Telegraph Act bad ki kyndon ba ïadei bad kane ban the lakam ïa ka jingsaphriang ki khubor hamsaïa bad ki jingthoh kiba pynshit online.
Na ka liang ki pulit ka Assam ki la ong ba ka jinglong jingman ha ka thaiñ Karigaon jong ka Kokrajhar district ka la lah ban the lakam pura.
Ha ka jingkynthoh paidbah, ki Pulit ka Assam ki la kyntu ïa baroh ki bynta jong ka imlang sahlang ba kin long kiba jai jai bad ban ban ym ngop ha ki khubor lamler ne ki khubor thok kiba la saphriang khamtam ha ki social media.
Katkum ka jingpynbna ba la pynmih da u Additional Chief Secretary (Home and Political) u Ajay Tewari, IAS, la ong ba kane ka jingkulmar ka la mih na ka jingjia ha ka miet jong ka 19 tarik mynta u bnai, ha kaba kawei ka kali Scorpio kaba kit ïa lai ngut ki Bodo ka la tynrah ïa arngut ki Adivasi ha Police Kokraj police station hapoh surok Mansingh.
Kine ki lanot la tip kyrteng kum u Sikhna Jwhwlao Bismit and Sunil Murmu. Sikhna Jwhwlao bad la kynnoh ba kila iap na ka jingshah shoh hadien ba mih ka jingklumar hapdeng ki ar kynhun, katba u hadien u Sunil Murmu u la khlad noh na ka jingmynsaw kaba u la ioh ha ka por ka jingklumar hadien katei ka jingshah pyniap.
Hadien katei ka jingjia, la kynnoh ba ki nongshong kali ki la shah thombor ha ki nongshong shnong Adivasi kiba don hajan, bad la thang ia katei ka kali.
Ka jinglong jingman ka la nang jur hadien kata, ha kaba ki dkhot jong baroh ar ki jaidbynriew Bodo bad Adivasi ki la khang ïa ka surok bah National Highway hajan ka jaka sah jong ki pulit Karigaon, ki la thang ïa ki taiar kali, ki la thang ïa ki katto katne ki ïing, ki la thang ïa kawei ka ïing ophis bad la kynnoh ba ki la thombor ïa ka police outpost.
Ki pulit ki la pynjur bad pynkhlain ka jingpahara kaba jur bha ha kylleng ki jaka jong ka distrik.
Ki heh ophisar ki dang peitngor bha ia kane ka jinglong jingman katba ki bor jong ka ain ki dang trei ban pynphai biang ia ka jingshong suk bad ban khanglad ia ka jingkulmar ban saphriang.
Hapdeng kane ka jingïakynad kaba la nang jur, ka All Bodo Students’ Union (ABSU) ka la maham ba kan khang dam ha kylleng ki jaka jong ka Bodoland Territorial Council (BTC) ha ka sngi ba-ar, da kaba pynpaw ba ki jingïakhih kin ïai bteng haduh ban da pynngat ïa kiba donkti ha ka ain.
Ki pulit haduh mynta ki la kem ia 29 ngut ki briew ha kaba iadei bad ka jingshah pyniap bad ka jingshah thombor kaba la jia hadien kata. Ka jingtohkit ka dang iaid shakhmat, katba ki bor pyniaid ki dang ap pahara bha namar ka jinglong jingman kaba sniew ha ka distrik.
