Guwahati, Nailar 11 : Ki Pulit ka Assam ha ka sngi Palei kila ioh ban kem ia 3 ngut ki runar kiba dei jong ka kynhun nongtuh pisa na ki kor Automated Teller Machine (ATM), kiba ju bujli ia ki ATM card jong ki briew ban ioh sei tuh ia ka pisa.
Ia kine ki runar la ioh kem na Marigaon Distict bad kine ki briew ki dei kiba ju shukor ia ki nongleit sei pisa na ki ATM da kaba pynbiej ia ki ba kin pyniarap lem ban sei pisa bad hadien ba ioh ia ki ATM card, ki ju bujli pat da ki ATM ba ki shna thok.
“Ngi la ioh kurup haduh 45 tylli ki ATM card, ka pisa T, 8000, ka kor PSU, ki PAN Card bad kiwei kiwei ki kot ki slab a donkam na kine ki briew” ong ki Heh Pulit.
Haba iakren bad ki nongthoh khubor, u Addl Superintendent of Police ka Marigaon District Samiran Baishya ula iathuh ba ha ka janmiet sngi Balang, ki Pulit kila ioh jingtip ia ka jingdon ki kynhun runar kiba tuh pisa da kaba pyndonkam ia ki ATM card jong kiwei pat ki briew kiba wan na Nagaon.
“Ngi la hiar tohkit mar mar bad ngi la pynap shrip hajan Nellie Outpost bad ngi la ioh kem ia kine ki briew. Ki Pulit kila bat ia ka kali jong kine ki runar hynrei kila pyrshang ban khet krad bad leit tynrah pynban ia ka kynroh jong ka surok” ula iathuh haba pyntip b alai ngut ki Pulit kila mynsaw ha kane ka jingjia.
Kine ki lai ngut ki runar ki kyrteng u Hanifur Rahman, Dewan Samsuddin Ahmed, bad u Sahidul Islam.
Pule lang ia kane: Manipur: Ai dorkhas haduh 40 ngut ki MLA sha u PM ba dawa weng noh ia ki Assam Rifle na Jylla
Peit lang ia kane
