Guwahati, Nailar 06: Ki pulit kila ioh ban pynpra noh ia kawei ka ktem khaii met ha Guwahati ha ka sngi ba-ar kaba la lam pat ban ioh kem ia saw ngut ki briew bad la ioh ruh ban pyllait im ia lai ngut ki kynthei kiba kylla long ki lanot ha kane ka jngkhynra.
U Deputy Commissioner of Police (East) u Mrinal Deka u la pyntip sha ki lad pathai khubor ba ia ka case la register ha Dispur Police Station hadien ba kila ioh jingtip shaphang katei ka ktem khaii met ia kaba la pyniaid na kawei ka guest house na Joyanagar.
Ha ka jingtohkit kaba nyngkong, ki pulit kila kem noh ia une u briew uba shah kynnoh ba kynthup ruh ia u trai jong ka guest house. Kine ki briew kiba la shah kem la tip kyrteng kum u Bapti Hazarika (u trai jong ka guest house), u Jonali Chowkham, ka Ritumoni Gohain Rabha, bad ka Riya Das.
Katkum u DCP Deka, kine kiba shah kynnoh kila pyniaid beain ia kane ka ktem khaii met mynta la kumba phra bnai.
“Katkum ka jingtohkit la paw pyrthei ba kane ka kynhun kila pyniaid ia kane ka kam pohjait hapoh la ka jong ka guest house lane d kaba shu shim kamra ha ki hotel,” u la ong.
Ka jingtohkit ba bniah ha kane ka bynta ka dang iaid sha phrang ban lap ia kiei kiei baroh la ki don ne em kano kano ka jingiadei ha kaba iadei bad kane ka kam khaii met.
