Guwahati, Naitung 23: Ki pulit ka Chirang ki la ioh ban lap ia kawei ka jaka pynlehkam tuh cyber fraud kaba treikam na shabar jong ka Jylla Assam bad ki la ioh ban kem ia 11 ngut ki riew shimet kiba iadei bad katei ka kam.
Kine ki briew kiba la shah kem ki kynthup u Afsar Uddin, u Matleb Ali, u Abdul Awal, u Akher Ali, u Saddam Hussain, u Golap Hussain, u Mir Kashem, u Anwar Hussain, u Jiarul Islam, u Manju Ali, bad u Surman Ali bad baroh ki dei ki nongshong shnong jong ka Bijni kaba hap hapoh ka jingpeit jong ka Bijni Police Station.
Haba kren sha ki lad pathai khubor, u SP ka Chirang, u Akshat Garg, u la ong, “Kane ka kam ka la paw pyrthei hadien ka jingujor jong uwei u Imran Hussain ha Binni police station 15 sngi mynshwa, da kaba kynnoh ba la doh ba pyndonkam ia ka bank account bad ka SIM card jong ka kurim jong u Afsar Uddin,”.
“U Hussain u la kynnoh ba u Uddin u la ioh ia ka Bank Account jong ka kurim jong u da kaba kular ban phah pisa ha ka job card ka Mahatma Gandhi NREGA” la ong u SP.
U SP u la bynrap “U Hussain u la kynnoh ruh ba la lap ia ka jingpyndonkam pisa kaba T.1 lak ha ka bank account jong ka kurim jong u, bad la lap ba la Block iaka account hadien ba u la leit wad jingtip na Home Branch”.
La register ia ka mukotduma hapoh ki kyndon jong ka jingthmu ban leh kam sniew, ka jingleh thok, ka jingpynkhein ia ka jingshaniah, bad ka jingtuh ia ki jingdon jingem hapoh ka ain Bharatiya Nyaya Sanhita ha ryngkat ki kyndin ain Information Technology Act, 2000.
Ki pulit ki la kurup ia ki sabut electronic, kiba kynthup ia 31 tylli ki ATM card, 26 tylli ki sim card, 9 cheque book, bad 12 tylli ki bank passbook na kti jong kiba nongshah kynnoh.
