Guwahati, Iaiong 30: Ka fast-track court kaba shong bishar halor ka jingkynnoh shah pynïap u nongrwai ba pawkhmat jka Assam u Zubeen Garg, ka la hukum ban kurup (freezing) ïa ki bank account bad ban bat noh ïa kawei ka kompeni kaba dei trai da u Siddharth Sharma, uba dei u manager jong une u nongrwai.
Ia kane ka hukum la pynmih da ka nongbishar ka Sharmila Bhuyan hadien ka prosecution kaba la pyni ia ki kot ki sla kiba kynnoh ba la shim kabu ia ka pisa na utei u nongrwai bad la pyniaid lyngba ki bun tylli ki account kiba iadei bad u Sharma.
Katkum ka ïingbishar, u chief investigating officer u la aiti ïa ki sakhi kiba pyni ia ka “siphoning, routing, cash whitening, and large bank deposits” ne ka “jingpynkhuid, ka jingpynkylla lynti, ka jingpynkylla ïa ka pisa, bad ka jingthep pisa kaba heh ha ki bank” ki bym ïahap bad ki rukom kamai ba la tip jong u Sharma. U nongbishar u la peit bniah ba ka prosecution ka la pynskhem ia ka case kaba khlain bha ba ki jingthep pisa ha kylleng ki hynriew tylli ki bank ki dei ki jingmih na ka kam runar.
“U nongshah kynnoh um shym la lah ban pynshisha ïa ka jingkyntait jong u da kaba pynmih ïa kino kino ki kot ki sla, kynthup ïa ka income tax returns, ban pynshisha ïa kum kine ki jingthep pisa kiba heh ha ki account jong u bad kiba haïing hasem jong u,” la kdew ka ïingbishar.
Shuh shuh ka kashari ka la kdew ba u Sharma um lah ban ai sakhi na ka bynta ka jingbei tyngka kaba ₹1.10 klur ha ka Mahavir Aqua na ki lad kamai kiba dei hok.
U Sharma u dei uwei na ki nongshah kynnoh ba ha khmat eh ha katei ka kam.Ka jingiap jong u Garg, kaba la jia katba u dang jngi ha duriaw, ha kaba sdang la iathuh ba ka dei kaba shu jia ryngkhat. Hynrei baroh arngut ki pulit bad u Myntri Rangbah ka Assam u Himanta Biswa Sarma ki la kynnoh ba ka don ka jingleh kam runar.
Hadien kane ka jingjia, ka Special Investigation Team (SIT) ba la thaw da ka CID jong ki pulit ka Assam ka la pynlong ïa ka jingtohkit kaba bniah bad ujor ïa ka mukotduma ha u bnai Nohprah.Ha katei ka chargesheet, la kdew ia ki kyrteng jong ki hynniew ngut ki nongshah kynnoh, ba kynthup ia u Shaymkanu Mahanta, uba dei u nongpyniaid ia ka North East India Festival. Saw ngut na ki nongshah kynnoh ki la shah pynngat ha ka kam pyniap briew.
Ka case ka dang iai bteng ban iaid sha khmat ha ka fast-track court.
 ïa ki bank account bad ban bat noh ïa kawei ka kompeni kaba dei trai da u Siddharth Sharma, uba dei u manager jong une u nongrwai.){kind=link}