Dibrugarh, Jymmang 15: Ki pulit ka Doomdooma kila ioh ban pyllait ia saw ki lanot na ka jingshah khaii briew ne human trafficking hapoh shi taiew na kylleng ki jaka bapher bapher ka jylla Arunachal Pradesh.
Katkum ki Pulit, la ioh ban pyllait im ia ki lanot na ka jingshah khaii briew na Mechuka bad mynta ka sngi ia kine ki lanot la wanrah noh sha Doomdooma police station.
Ha shwa jong kane, ki pulit ka Doomdooma hapoh ka jingialam u Sub-inspector u Arpana Gogoi kila ioh ban pyllait im ia lai ngut ki lanot na ka jingshah khaii briew na Papum Pare district jong ka Arunachal Pradesh.
Ki pulit kila kem ia lai ngut ki briew kiba la shah kynnoh bad la set noh ia ki hapih along.
“Ngi la ioh ban pyllait im ia saw ngut ki lanot na ka jingshah khaii briew hapoh kane ka taiew na Arunachal Pradesh. Ka jingpyrkhing jong ngi pyrshah ia ka jingkhaii briew kan dang iai bteng,” la ong u Ophisar ba dei peit ia ka thanat Doomdooma, u Manoranjan Saikia
Ki tyllong khubor ki iathuh ba katei ka kynhun khaii briew ka trei kam bha ha ka thain Eastern Assam bad lyngba ki agent ki nongkhaii briew ki kham pynleit jingmut ia ki khynnah ba dang rit ka rta da kaba pynngop ia ki ban ioh kam.
Kane ka kynhun khaii briew ka la treikam bha ha ki jaka rep sla sha bad bunsien, ki pynngop ia ki khynnah kynthei na ki longiing kiba duk, da kaba pynbang ia ki ba kin ioh kam da kaba suk shabar jong ka Assam. La ialam ia ki sha ki jaka bym lah ban tip bad die noh ia ki. Kiba bun na ki ki la shah pynbor ban leh kam khaii met,” ong u dkhot jong ka seng trei mon sngewbha kaba peit ia ki kam khaii briew.
