Guwahati, Naiwieng 20: Uwei u samla 21 snem Mrinal Majumdar ula iap hadien ka jingshah rem ka India ha ka Worldcup phainal pyrshah ia ka Australia hynnin ka sngi U Blei.
Kat kum ka khubor, u Majumdar uba ieid cricket bha, ula sngewsih kthang hadien kane ka jingialehkai, kaba la pynlong ia u ban nym bam nym dih eiei baroh shimiet.
Ia ka samla la lap hapdeng ka jingbym tip briew da ki bahaiing hasem ha ka step sngi Nyngkong bad la pynkit mar mar sha Hayat Hospital hynrei ki doktor kila pynbna ba ula khlad shuwa ban poi sha ka jaka sumar.
Kane ka jingjia kala pynkyndit ia ka shnong ka thaw, ki para marjan bad ki paralok kiba la iatuid sngewlem sha ka iingsah jong une u samla uba la khlad tang namar ka jingieid palat ia ka cricket.
Ia ka metiap u Mrinal Majumdar la phah sha Gauhati Medical College bad Hospital ban pyndep ia ka post mortem. La ioh jingtip ba u Mrinal u dei uba shait ba khlain bha hynrei ia ka daw jong ka jingiap, yn sa lah ban tip hadien ba dep ka post mortem.
U Mrinal u dei u samla pule ka Birubari ITI bad u dei u khun marwei jong kaneka Longiing. U Kpa Ajit Majumdar u dei u clerk jong ka NEF Law College.
