Guwahati, Jymmang 29: Ha ka jingjia ba sngewsih, hynniew ngut ki samla pule Engineer ka Assam Engineering College, Guwahati, kila iap hashen ha ka jingjia iatakhuh kali ha ka miet Sngi U Blei ha Guwahati.
Kine ki samla kiba iap ki kyrteng u Imon Baruah na Dibrugarh, Kaushik Mohan (Sivasagar), Arindam Bhuwal (Guwahati), Niyor Deka (Guwahati), Upangshu Sarma (Nagaon), Rajkiran Bhuyan (Majuli), bad Kaushik Baruah (Mangaldoi).
Kat kum ka khubor, kane ka jingiatakhuh kali kala jia ha ka shiteng miet jong ka Sngi U Blei, kaba long hapdeng ka Scorpio bad ka Bolero Pick Up. Kane ka jingjia kala jia hajan ka Jalukbari Flyover, Guwahati.
Kat kum ka jingiathuh ki Pulit, kine ki samla ki dei kiba iashong ha ka Scorpio bad kila iashongshit kyaid lut.
“Ka Scorpio kaba la pynher sted bha, kala leit ban tynrai ia ka Bolero Pick Up” ong ki Heh Pulit kiba iathuh ba kine ki samla ba iap ki dei sah hostel ha kane ka college.
“Ki don haduh 10 ngut ha kane ka kali ha ka por ba jia kane ka jingiatakhuh. Napdeng kine ki 10 ngut, hynniew ngut kila iap hashen katba kiwei pat kila mynsaw bad la pynkit mar mar sha Guwahati Medical College bad Hospital ban ioh ia ka jingsumar” ong ki Pulit.
