Tinsukia, Jylliew 09: Arngut ki nongtih dewiong kila iap shapoh ka par tih dewiong thliew khnai ha ka thain Ledo, kaba hap hapoh ka Tinsukia District.
Ia ka metiap jong kine ki nongtih dewiong la lap ha ka sngi Balang na ka par kaba don ha Molo Pahar, kaba hap hapoh ka Ledo Police Station.
Ki Pulit ki suba ba kine ki briew kila iap na ka jingioh ring ia ka lyer bih kum ka methane ha kane ka par dewiong ba beain ha Ledo.
Uwei na kine ki nongtih dewiong ba iap u kyrten gu Nayan Phukan, uba dei u nongshongshnong ka Itakhuli, kaba don ha Ledo.
Ka khubor ka pyntip ba kine ki briew kila pyntrei ia kane ka par jong u Kitest Debnath, uba pyniaid ia ki kam khaii dewiong beain ha Ledo.
“Kiba bun bah ki samla kila iap ha ki par dewiong thliew khnai bad kiba bun ki dei kiba wan na ki longiing kiba duk. Dang ha ki khyndiat bnai, uwei u samla na Makum ula iap shapoh ka par ha ka thain Ledo hi. Une u samla u kyrteng u Pranjal Moran bad ia ka metiap jon gu la lap hadien lai bnai na kane ka par” ong ka khubor.
Dang ha u bnai Nailur 2022, haduh 3 ngut ki nongtih dewiong kila iap shapoh ka par thliew khnai ha Ledo. Ki pulit ki pyntip ba ki par dewiong thliew khnai kila mih kum u tit ha Margherita bad Ledo da ka jingiadonkti jong ki nongkhaii beain kiba la nang bun hapoh ka thain.
