Guwahati, Iaiong 11: Ki nongrep na ka jylla Assam ha ka sngi Palei kila pynlong ka jingiakhih kaba jur bha ha ka thain Merapani jong ka Golaghat district kaba long pyrshah ia ka sorkar Nagaland kaba la bthah ia ki ban ym leh kino kino ki kam rep kam riang ha ka thain namar ia kane ka jaka la buh ban thung ia ki dieng palm.
Da ki spah ngut ki nongrep kila ia mih ban iaid rally ban leit aiti ia ka dorkhas ba dawa ban pynneh ia ka status quo ha ka DAB bad la dawa ia ki bor sorkar ka Nagaland ban weng noh ia ka jingker ha kane ka jaka.
Kumba 1,200 ngut ki nongrep na ka thain Merapani kin sa shah ktah katkum ka circular kaba la pynmih ha ka 22 tarik u bnai Lber da ka State Seed Farm, Merapani, hapoh ka jingpeit ka sorkar Nagaland.
Kane ka seed farm ka don hapoh ka Disputed Area Belt (DAB), ia kaba la kam da baroh ar tylli ki jylla ka Assam bad Nagaland.
Kane ka mat kadei ba sngewkhia bha bad ki nongrep kiba ju rep ha ka seed farm la shah bthah ban kin sangeh noh ia ka kam rep ka jong ki bad lada ym lah ban peit bniah, ki nongrep kin sa duh ia ka lad kamai kajih.
Kane ka jingthmu ban buh ia ka palm oil plantation kan sa shah kthah bha ha kaba iadei bad ka um ha kane ka farom bad ki jaka ba marjan nad ba ka oil palm ka donkam 300 litres ka um man ka sngi.
Ka jingeh hapdeng ka sorkar Nagaland bad ki nongrep na ka jylla Assam kala sdang hadien ba kawei ka liang kala dawa ba ka jaka la long trai da ki.
