Guwahati, Lber 25 : U Myntri Rangbah ka Assam Himanta Biswa Sarma ha ka sngi U Blei, ula leit iuhkjat ha ka Ophis treikam ka AGP ha Ambari, Guwahati bad pynlong ia ka jingiasyllok bad ki Nongialam kane ka seng sain pyrthei ha kaban pynkhreh ia ka elekshon Lok Sabha.
U Himanta ula iashimbynta ruh ha ka jingialang jong ki Nongialam bad Nongkitkamka AGP.
Ka AGP ka dei ka paralok ba iatreilang hapoh ka NDA bad ka iadonlang ruh ha ka Sorkar Assam kaba ialam da ka BJP.
Ha kane ka elekshon, ka AGP kala iakhun na artylli ki seat (Barpeta bad Dhubri) katba ka BJP kala iakhun na 11 tylli ki seat bad ka UPPL kala iakhun na kawei ka seat (Kokrajhar).
U Himanta haba kren halor kane ka elekshon Lok Sabha, ula ong, ba ha kane ka elekshn, ka BJP bad ki paralok ba iatreilang kin ioh ia ka jingjop kaba thaw record.
“Ngin jop ha Jorhat da 2-2.5 lak vote, ha Barpeta da 2.5-3 lak vote, ha Kokrajhar da 2.5 lak vote, ha Dibrugarh da 3 lak vote, ha Guwahati da 5-5.5 lak vote, ha Nagaon da 50,000-70,000 vote bad ha Sonitpur da 3 lak vote. Kan don ka jingiakhun ha Nagaon bad Karimganj seat”ula ong haba ai jingkren ha ka rally.
Ula ong ruh ba shuwa ka elekshon Assembly ha Jylla, u President ka Assam Pradesh Congress Committee Bhupen Kumar Borah ruh un sa wan iasoh noh sha ka BJP.
U President ka AGP bad Myntri Sorkar Atul Bora ula pynpaw ia ka jingkmen bad ong ba “Ki nongtrei ka party jong ngi ki kmen bha ba u CM Himanta Biswa Sarma ula wan sha ka Ophis jong ngi bad iamir jingmut halor ka jingpynkhreh ia ka elekshon”.
