Guwahati, Nailar 19: Ka iing bishar jong ka Gauhati high court ha ka sngi Nyngkong kala bthah ia ki 74 tylli ki long iing kiba sah ha Doyang bad Nambor reserve forests kaba don ha Golaghat ba kidei ban mih noh bad pyllait ia kane ka jaka jong ka tnad Forest hapoh hynniew (7) sngi
Na ka liang jong ka sorkar jylla kan iaid beit sha khmat ban kyndang ia ki, lada kim lah ne kim pyllait noh ia kane ka jaka ba ki shong ki sah.
Ka division bench jong u Chief Justice Ashutosh Kumar bad u Justice Arun Dev Choudhury, haba bishar ïa ki jingujor jong ki 74 ngut ki nongwan buhai shnong beain kiba tuklar ïa ka jingkyndang ban pynkynriah, ka la pynshai ba ka “ïingbishar ka la dep ai por pynjlan ïa ki nongmudui ba kin mih noh na katei ka jaka jong ka tnad Forest”.
Ka division bench ha ka 5 tarik u bnai Nailar kala pynjlan ia ka por haduh ka 14 tarik mynta u bnai Nailar, da kaba bthah ia ki ba kin pynshisha ia ka jingkam ka jong ki ha kaba iadei bad ka jaka lane ban pyllait bad ban pynthylli noh.
Shuh shuh ka Court kala bthah ruh ia ka sorkar ba kadei ban pyntikna ban leh ia ka rukom talasi kaba biang ban iada na ka jingrung beain sha ka jaka khlaw ba la buh kyrpang ne ki reserve forest area.
Ka iingbishar ka la ong ba ka jingbishar bniah ia ka jinglong jingman man ka por kan iarap shuh shuh ban tei ia ka jait rukom treikam ban khanglad ia kum kane ka jingrung khlem jingbit sha ka jaka khlaw ne sha ki reserve forest area.
“Ka jingpeitngor ba man ka por ia ka jaka khlaw (reserve forest area) kan long kaba donkam bha ban pynthikna ba ki nongwan rung tuh kin ym rung biang shapoh ka khlaw ba la buh kyrpang bad ban pynsniew ia ka jinglong jingman jong ka mariang,” la ong ka iingbishar.
 sngi){kind=link}