Shillong, Naitung 16: Ka kynhun jong ka seng Congress hapoh ka jingialam jong u General Secretary ka AICC u Jitendra Singh hynne ka sngi, ka la hiar sha ka Morigaon district jong ka Assam bad iakynduh ia ki briew kiba la shah ktah ha ka jingshlei um.
Ia u Jitendra Singh la synran da u President ka Assam Pradesh Congress Committee (APCC) u Bhupen Borah, u nongialam ka CLP u Debabrata Saikia, u MLA u Jakir Hussain Sikdar, u Rekibuddin Ahmed bad ka Nandita Das.
Ki la sam ïa ki tiar pynshlei um sha ki paidbah kiba la shah ktah ha ka jingshlei um ha ka thaiñ Mayang jong ka Morigaon district.
Haba kren sha ki nongthohkhubor, u heh ka APCC u Borah u la ong, “Ka long kaba sngewsih haduh katta katta ba kane ka jaka kaba hap hapoh ka Jagiroad assembly constituency kaba mihkhmat da u myntri ka Assam u Pijush Hazarika. Phi lah ban iohi ia ka jinglong jingman ha ki 15 sngi ba la dep, ki briew ki la don hapdeng ka jingshlei um bad ki la ioh ia ka jingiarap na ka bynta kawei sngi. 1 kg u khaw, 200 gram dal kane ka dei tang ka jinglong jingman jong ka jingïarap. Ka Sorkar ka ong baka Liangpyrshah ka leh Politcs hynrei lada iarap iaki paidbah kadei Politics, ngin iai bteng ba leh Politics”.
U general secretary ka AICC u Jitendra Singh Alwar u la ong, “Mynta ka sngi nga sngewsih shibun ba ka rukom leh ka sorkar. Katne ka jingshlei um ka la jia ha Assam, palat 70 ngut ki briew ki la iap, 30 lak ngut ki la shah ktah ha ka jingshlei um, hynrei kaei ka sorkar leh?, Nga la peit bniah ia kane la 10 snem ba la leit noh, man ka por shwa ka elekshon Lok Sabha bad elekshon Assembly, u Modi ju ong ba mynta ka jingshlei um kan ym wan shuh, Phi kren ia ka Double Enginem, hynrei tang kawei ka Engine, ruh ym don, Haduh mynta ym pat lap ia ki tiar iarap.”
Ka jinglong jingman jong ka jingshlei um ha Assam ka la nangbha suki suki wat haba palat 5 lak ngut ki briew ha ki 17 tylli ki distrik ki dang khih hapoh ka jingshlei um, la iathuh ki tyllong khubor ha ka sngi Balang.
U Myntri kam pohïing ka sorkar pdeng u Amit Shah u la phone ïa u Myntri Rangbah ka Jylla Himanta Biswa Sarma ban wad bniah ïa ka jinglong jingman, da kaba pynthikna biang ïa baroh ki jingïarap na ka Centre.
U Myntri Rangbah ka Jyla Assam ruh ula ioh ruh ka jingtyrwa na u Myntri Rangbah ka Jyla Odisha uba la tyrwa ban pyndonkam iaka Eastern State Disaster Management System ban tem iaka jingshlei um bad ki jingeh ki paidbah.
