Guwahati, Jylliew 14: U Myntri Rangbah ka jylla Assam u Himanta Biswa Sarma u la kyntu ia u Myntri Rangbah ka Uttarkhand, u Pushkar Singh Dhami, ba un phah tohkit bniah halor ka jingiap ba iphylla jong ka Rosmita Hojai na Dima Hasao district, Assam, kaba la lap narud jong ka Wah ha Uttarakhand.
La pyntip ba ka Rosmita kala leit sha Delhi ban ialeh ia ka eksamin thungkam jong ka Railway Recruitment Board bad hadien la synran ia ka da ar ngut ki briew sha Rishikesh. La ioh jingtip ba kala jah rngai ha ka 6 tarik mynta u bnai Jylliew bad ia ka met jong ka la lap na ka Wah Ganga san sngi hadien bad kane kala pynsuba sniew.
Haba pynpaw ïa ka jingsngewkhia halor kane ka jingjia, u Sarma u la thoh ha ka rynsan social media ha ka X: “Ngi sngewkhia ïa ka jingkhlad noh jong ka Rosmita Hojai, bad khamtam eh iaka jinglong jingman halor ka jingkhlad noh ka jong ka. Da lade hi nga la kyrpad ia u myntri rangbah ka Uttarakhand, Shri @pushkardhami Ji, ban peit lem halor kane ka mat khnang ban ioh ia ka jingbishar bah ok”.
Na ka liang kiba ha iing, kila kynnoh ba la shah leh bei jot bad kila dawa ban don ka jingtohkit kaba janai. Halor kane ka register ia ka Zero FIR ha Assam bad la pynkynriah sha thanad ba dei peit ha Uttarakhand ban leh ia kaba donkam.
Kane ka jingjia ka la pynmih ïa ka jingsngewkhia kaba jur ha Assam, ha kaba la dawa ban don ka jingkitkhlieh bad ka jinglong kaba shai ha ka jingtohkit.
