Boko, Lber 10: Ka Bodo Coordination Committee ka la ther tyngeh ïa ka Sorkar Assam halor ka jingkynnoh ba ka la leh klet ïa ki jingeh jong ki jaidbynriew Bodo ha South Kamrup bad Goalpara District.
Haba ai jingkren ha ka jingialang bad ki lad pathai khubor ha ophis jong ka South Kamrup District ABSU office ha Boko ha ka sngi ba-ar, ki nongialam ki la kynthoh ia ka sorkar ba ka pyndonkam da ki buit thok ha ka jaka ban pynbeit ia ki jingdawa kiba la sahteng la slem bha.
Ka Committee kaba kynthup ïa ki 19 tylli ki seng Bodo na South Kamrup bad Goalpara, ki la rai ba lada ka sorkar kam shim khia mardor ban weng ïa kine ki jingeh, ka imlang sahlang kan ai ïa ka jubab kaba biang ha ka elekshon 2026 ban wan.
Ka jingdawa pdeng kaba la wanrah ka long ban weng noh ia ki 312 tylli ki shnong Bodo na ka Rabha Hasong Autonomous Council (RHAC) bad ban pynrung ia ki ha ka Bodo-Kachari Welfare Autonomous Council (BKWAC), katkum ka Clause 5 jong ka 2020 Bodo Accord.Ka Committee ka la kynnoh ba wat hapdeng ka jingujor bunsien hynrei u Myntri Rangbah ka Jylla u Dr. Himanta Biswa Sarma um shym la leh eiei halor kane ka kam.
U nongaiktien u Dhiraj Hajowari u la pynpaw ïa ka jingsngewsih, da kaba kdew ba naduh u Nailur 2024, u Myntri Rangbah ka Jylla ula ïakynduh ïa ka Committee haduh saw sien hynrei ym shym la shim satia kano kano ka rai kaba skhem.U la kynnoh ba ka sorkar ka la shet kylla ia ki jaitbynriew Bodo wat hapdeng ki jingpynthikna.
Ha kane ka jingïalang bad ki nongthoh khubor la ïadon lang da u Hajowari, u Working President u Tulashidhar Bodo, u Advisor u Prafulla Kumar Bodo, bad ki nongïalam ka Bodo Students’ Union na South Kamrup bad Goalpara.Ki la maham ba lada ka sorkar kam lah ban pynbeit ia katei ka jingeh shwa ka elekshon, ka jaitbynriew kan pynbna ia ka lynti treikam jong ka lyngba ka jingialang paidbah.
Shuh shuh la pynpaw ba ka RHAC mynta ka kynthup ia 779 tylli ki shnong, bad ka jingpynkylla ia ki 312 tylli ki shnong Bodo kan pynkylla shibun ia ka jinglong jong ka.Ka Committee ka la pynpaw biang ba katei ka jingdawa ka la sahkut naduh u snem 2024, hynrei ka dang sahkut haduh mynta khlem pat lah ban pynurlong.
Ki nongialam ki la pynkut da ka jingmaham kaba jur, lada ka sorkar kam leh kloi, ka jaitbynriew Bodo kan jubab da kaba tyngeh ha ka madan election.
