Guwahati, Jymmang 05: U Myntri Rangbah ka Assam Himanta Biswa Sarma hynne ka sngi Thohdieng, ula bthah ia ki bor district ka Cachar ban khmih bad iarap lem ia ki Longiing na Manipur kiba kylla phetwir na ka jingjia iaumsnam bad wan poi hapoh ka Jylla.
“Bun bah ki Longiing kiba shah ktah na ki jingjia ba dang shen ha Manipur, kila wan riehtngen ha Assam. Nga la kyrpad ia ki bor District ka Cachar ba kin peit bad ai jingiarap lem ia kine ki longiing” ong u Himanta ha ka tweeter.
U Himanta ula ong ba u khlem sangeh ban iakren bad u Myntri Rangbah ka Manipur N Biren Singh halor ki jingjia ha Manipur. “Nga la iakren khlem sangeh bad u Myntri Rangbah N Biren Singh bad nga la kular ban ai ka jingiarap ba pura n aka Sorkar Assam ha kum kane ka khep ba jynjar” ong u Himanta.
Naduh hynnin ka sngi Balang, ka Manipur kala sakhi ia ka jingiaumsnam kaba shyrkhei hapdeng ki riewlum jong ka jaidbynriew hehpaid Meitei bad ki paid riewlum ba rit paid, kaba la pynkylla phetiwr ia palat 10000 ngut ki briew.
Kane ka jingiaumsnam kala khie ha ka sngi Balang na ka jingiaid rally “Tribal Solidarity March” bala pynlong da ka ATSUM ban pyrshah ia ka jingdawa ki Meitei ban ai jingithuh ia ki kum ki Scheduled Tribe ka Jylla.
Ka Sorkar bad ki shipai kila kam ba ka jinglong jingman ha kylleng ki jaka jong ka Manipur kila kham jai ai mynta lyngba ka jingiatreilang jong baroh ki kynhun. Ki shipai Indian Airforce ki dang iai bteng ban wan kit ia ki shipai sha Manipur ban tem ia ka jingiakynad.
