Guwahati, Naiwieng 10: U Myntri Rangbah ka jylla Assam u Himanta Biswa Sarma ha ka sngi Nyngkong u la bthah ia ki Pulit ba kin leh da kaba tyngeh pyrshah ia ka jingtuh ne piracy ia ka film ‘Roi Roi Binale’ jong u Zubeen Garg.
Haba ia kren bad ki lad pathai khubor u Sarma u la ong, “Ngi sngewkhia halor ka jingtuh ne leh piracy ia ka film ‘Roi Roi Binale’ bad la bthah ia ki pulit ba kin leh da kaba tyngeh ban sangeh ne pynduh jait ia ka piracy. Nga kyrpad ia ki paidbah jong ka Assam ba kim dei ban ia donkti ha kaban leh ia ka piracy. Lada don mano mano ba lap ia ki briew kiba leh ia ka piracy mar mar kidei ban pyntip sha ki Police Station kaba don hajan”.
“Ngim shym la khmih lynti ia kane.Ka jingeh kaba thymmai ka la mih kynsan kaba long ka jingma ia ka kam shna phlim jong ka Assam.Ka ‘Roi Roi Binale’ ka dei ka phlim ba khatduh jong u Zubeen Garg bad mynta ki don ki briew kiba kiba donkti ha ka kam tuh ne ka piracy.Ka phlim ka dei ban ioh ia ka jingjop ha ka liang ka jingpyniaid iew hynrei mynta la iohi ba ki briew leh recording ia ka phlim bad ki thep pat ha ki rynsan social media,” ong u Samujjal Kashyap uba dei u nong shna film ka Assam.
U la ong, “Nga kyrpad ia ki briew ba kim dei ban leh ia kum kane ka jait kam ba shu tuh lada phi ieit bad thoin shisha ia u Zubeen Da. Wat ym thep ne upload ia ka film. Katto katne ki karkhana heh kiba donkti ha ka kam thok ki leh thok ia ka phlim hadien ba ki la iohi ia ka jingiaid iew bha jong ka phlim,”.
“Nga kyrpad ia ki paidbah ban pyntip ia katei ka kam leh tuh. Ki don ki seng kiba shyrkhei kiba kamai pisa da kaba shna 4 k video jong ka phlim. Ki paidbah ki dei ban pyntip bad sangeh noh ia ka jingleh tuh,” la ong u Kashyap.
Ka film ‘Roi Roi Binale’ kadei ka film ba khatduh ong u Zubeen Garg, ia kaba la pyllait paidbah ha ka 31 tarik u bnai Risaw mynta u snem 2025, kaba la ioh ia ka jingkyrshan ba pura na ki paidbah. Ki briew ki ia tuid sha ki cinema hall tang ban peit ia kane ka film.
Ki Pulit jong ka Dibrugarh kem ia kawei ka kynthei na ka thain Moran hadien ba kala shah kynnoh ba kala peit ia ka film kaba hit bha ba shu tuh ne leh piracy ia ka film Assamese ka ‘Roi Roi Binale’ kaba la ak da u Zubeen Garg, ha ka mobile jong ka.
Katkum ki report, Kane ka kynthei la tip kyrteng kum ka Junty Gogoi, kaba buh ia ka dukan fast-food hajan jong ka Housefull Talkies ha Moran.La iathuh ba ki nongshong shnong ki la iohi ia ka ba ka dang peit ia katei ka phlim bad mar mar ki la pyntip sha ki dkhot jong ka Zubeen Friends Club.
Ki nongshna ia kane ka phlim romantic drama jong ka Assam, ka Roi Roi Binale, ki la sngewkhia halor ka jingsaphriang jong ka jingsha tuh kaba la ktah ia kane ka phlim tang hapoh katto katne sngi hadien ba la pyllait ia ka. Ka jingkyrpad jong ki ban ioh ia ka hok ka la pynmih biang ia ki jingiakren shaphang ka jingma kaba nang jur jong ka jingshah tuh ne leh piracy ia ka film hapoh jong ka Assam entertainment industry.
