Guwahati, K’Lyngkot 29: U Myntri Rangbah ka Assam Himanta Biswa Sarma, sa pynlong sohpdung biang ia ki ‘Miya Muslim’ da kaba bthah ia ki kontraktor jong ka tnad PWD, ba kin ai kam tang ia ki nongbylla na Jylla bad sangeh syndon ka ai bylla ha ki briew na Dhubri.
U Sarma u la kyntu ruh ia ki nongtrei jong ka party jong u bad kiwei kiwei ki briew ban ujor pyrshah ia ki ‘Miya Muslim’ ban pynjynjar ia ki.
Haba kren ha ki lad pathai khubor khubor, u Sarma u la ong, “Lada ka Lachit ka jop ia ka Saraighat balei ba ki nongtrei ka Assam kin ym lah ban shna jingkieng.Ka por ka la dei ban pynkylla ia ka jingmut jingpyrkhat. Baroh ki kam technical jong kane ka jingkieng Bogibeel la leh da ki nongtrei Assamese jong ngi. Iaka jingkieng Bogibeel la leh da ki nongtrei local ba 100 percent jong ngi.”
“Ha ka Semi conductor unit ha Jagiroad, bun ki nongtrei Assam ki trei. Nga don ka jingthmu ba ia ryngkat bad ka kam pynroi ia ki jingtei, bad ka ioh ka kot kan shngain ia ka jaitbynriew Assam. Nga la ong ia ki kontraktor PWD ban pynkylla ia ka jinglong jingman da kaba pynrung kham bun ki nongtrei local. Ban trei kam ha Majuli, ngi hap ban khot ia ki briew naDhubri. Ki local ki jong ngi kidei ban ioh ia ka lad bad ia ki dei ban ai ka jinghikai,” la ong u Sarma.
Shuh shuh u la ong, “Ngi dang peit ia kane bad ngin shim ia ki lad ki lynti ban pynkylla ia ka.”
U CM ka Assam u la pynjur shuh shuh ia ka jingpyn jynjar jong u ia ki nongtrei kiba dei ki ‘Miya Muslim’ bad ha man la ki jingialang la iohi ba u beit tang ia kawei ka jaitnbynriew. Ki nongtrei ‘Miya Muslim’ ki la trei ha ki kam shna ïing ha kine ki phew snem ba la dep ki la shim ïa ka bynta ba hakhmat eh ha kaba pynbiang ïa ki nongtrei na Dhubri, Barpeta, bad kiwei kiwei ki distrik jong ka Assam ba sharum.
Ka jingkiew jong ki ‘Miya Muslim’ dang shen ha ki kam shna ïing ka la long ka daw jong ka jingsngewkhia ïa ki nongtrei trai ri trai muluk jong ka jylla.Ki nongbylla sngi jong ki nongtrei jong ka Miya Muslim ka long kaba kham duna ban ianujor bad ki nongtrei trai ri bad kiba bun ki kontraktor ki shim ia ki nongtrei jong ki na ki bynta jong ka lower Assam.
U CM ka Assam u la pynshlur ruh ia ki paidbah ka jylla ban ai jingjynjar ia ki Miya muslim ban beh noh ia ki na kane ka jylla.
Haba kren sha ki nongthoh khubor, u Sarma u la ong, “Pynthut beit ia ki Miya Muslim da kino kino ka lad ki lynti ba kin mad jingeh. Lada ki iakynduh jingeh na ka jingshah pynthut, kin hap ban mih hi na Assam.Lada nga kwah ban ai jingeh ia ka Miya, nga lah ban leh ha ka por 12 baje mynstep.Kam don jingeh eiei ruh em ka. Ngin pyrshah beit ia ki Miya Muslim. Ngin ym buhrieh ei ei—ngi kren shai ba ngi long pyrshah ia ki Miya.”
“Kham ha shwa, ki briew ki sheptieng ba yn sa ai notis pyrshah ia ki.Mynta, nga pynshlur ia baroh ban ai ka jingpyn jynjar ia ka Miya.Hynnin ka sngi, nga la iohi ba ki la poi ha Duliajan. Ka Tsunami kan jia hangne hynrei ka result kan long ha Pakistan,” la ong u Sarma.
