Guwahati, Nailur 06 : Shuwa ka jingwan jong ka elekshon Lok Sabha, ka BJP High Command kala bthah ia u Myntri Rangbah ka Assam Himanta Biswa Sarma ba un pynbeit noh ia baroh ki kynrum kynram kiba don bad ki dkhot barim ka Party khnang ba ki kam ki jam baroh kin iaid beit iaid ryntih sha ka elekshon.
Ka tyllong khubor ka iathuh ba ki Nongialam na Delhi, hadien ka jingioh pdiang ia ki jingujor kiba bun na ka Assam Unit, kala bthah ia u Himanta Biswa bad kiwei ki Nongialam rangbah ka party ba kin pynbeit noh ia kine kiei kiei baroh.
La ioh jingtip ba bun ki Nongialam bala rangbah ka BJP kila shah kyntait sharud ha kiba bun ki kam ba iakren. Kine ki Nongialam kila pynpaw ia ka jingbym sngewtynnad ia ka rukom treikam jong u Himanta Biswa Sarma.
Uwei u Nongialam rangbah ka BJP Rajen Gohain dang shen ula iehnoh na ka kam Chairman ka Assam Food & Civil Supply Corporation da kaba kynnoh ba ka jingphiah dangshen ia ki constituency ka Assembly bad Parliamentary kala buh ia ka Nagaon seat ha ka jingeh ia ki kyrtong ka BJP ban jop biang hadien habud bad buh ruh ia ki paid Nagaon ha ka jingma namar ka jingkylla ha ka jingdon paid jong ki jaidbynriew bapher bapher.
Ka Assam ka phah haduh 14 ngut ki MP sha Lok Sabha bad satang shisnem duna ban leit sha ka elekshon, kala buh ha ka jingkhuslai ia ka BJP namar ka jingialeh pyrshah jong ki nongialam ia u Himanta Biswa.
U Baijayant Jay Panda, nongialam ka BJP ha Assam ula lum ia katto katne ki jingialang bad ki Nongialam kiba thut ia u Himanta ha ka 29 tarik Nailar ha Guwahati.
Kila kynnoh ba ki briew ba dang shu wan rung thymmai sha ka party ha u snem 2015, ki don ka jingthmu ban beh noh ia ki nongtrei bala rim jong ka party.
