Guwahati, Iaiong 1: Uwei u khla thapsim (leopard) u la shah pyniap noh ha ki paidbah ha ki bynta jong ka Golaghat district ka Assam ha kane ka sngi Thohdieng ba la lah.
Katkum ki khubor la ong ba kane ka jingjia ka la jia ha Tengani ha ki bynta jong ka Barpathar ha ka thain kaba don ki kper slasha.
Ki tyllong khubor ki iathuh ba kawei ka longkmie ka dang bsa phlang ia ki jingri jong ka hadien ba une u khla u la mih kynsan bad thombor ia ka.Ha kane ka jingjia arngut kiwei pat ki briew ki la ngat ha ka jingmynsaw katba ki dang pyrshang ban iarap ia kane ka longkmie.
Katkum ki khubor la ong ba ki paidbah namar ka jingbitar halor kane ka jingjia ki la behthong bad pyniap noh ia utei u khla da kaba mait lyngkhot hashwa ban tep noh ia u. Hadien jong kane ka jingjia ia ki laingut ki briew kiba la ngat ha ka jingmynsaw la pynkit noh mardor shapoh Golaghat Civil Hospital.
Ha kawei pat ka bynta, na ka liang ka tnat forest bad ki bor pulit ki la wan poi ha katei ka jaka bad sei biang ia ka metiap jong utei u khla na ka bynta ban leh ia ka post mortem.
“Hadien ba ngi la ioh ia ka jingtip, ngi la wan poi mardor ha katei ka jaka ban lapdien ia ka doh jong une u khlad uba la shah pyniap.Une u khlad u la shah bom shah tied bad shah mait lyngkhot ha kipaidbah.Ngi la sdang ban pynlong ia ka jingtohkit halor kane ka jingjia,” ong u heh ka tnat forest.
Ka jingiatyngkhuh hapdeng ki mrad bad ki briew ka la nangjur namar ka jingnang duna ki jaka khlaw.Ia ki khla thapsim la ju tip bha ha kaba iadei bad ki kam thombor pyrshah ia ki jingri jingdup bad ia ki briew kumjuh, bad kiba kum kine ki jingjia ki ju wanrah ruh ka jingiap jong ki mynsiem briew bad kumjuh ia kine ki mrad khlaw (khla).
