Assam | Aiti ka SIT ia ka Chargesheet ba bniah sha Iingkashari halor ka jingiap u Zubeen Garg

Guwahati, Nohprah 12: Ka Special Investigation Team (SIT) ha ka sngi Thohdieng kala aiti ia ka charge sheet kaba bniah halor ka jingiap ba phylla jong u nongrwai Zubeen Garg. Kane ka chargesheet ba la aiti ka don haduh 3,500 ki sla (page) bad la aiti ha u Chief Judicial Magistrate’s Court ha Guwahati, bad la registered hapoh ka ejahar No. 18/2025.

Ia kane ka charge sheet la aiti da ka Rosy Kalita ha ka jingdon lang ryngkat ki dkhot jong ka SIT, kum shi bynta jong ka kynhun ba la lam khmat da u SDGP u Munna Prasad Gupta, ha ryngkat bad ki ophisar Moromi Medhi bad Nab Dekai.Ka jinglum jingtip kaba bniah ka pynpaw ia ka jingheh bad kaba bniah bha jong ka jingtohkit kaba la neh da ki bnai.

Tang shu poi ka kynhun SIT ha ïngbishar, da ki spah ngut ki nongkyrshan jong u Zubeen Garg kila ia lum paidbah shabar, kaba pynpaw ia ka jingsngew ka jong ki paidbah ha kaba iadei bad kane ka case.Ka campaign online na ka bynta “ka hok na ka bynta u Zubeen” kala nangioh bor ha kaba kila dawa ba ka jingtohkit kadei ban long kaba khuid ne transparency.

Ki heh ophisar ka SIT ki la pynthikna ba palat 300 ngut ki briew ki la shah tohkit lang ïa ki jingjia kiba la pynlong ïa une u nongrwai ban khlad noh khlem por. Haduh mynta ki don 7 ngut ki briew kiba la shah kem, kiba kynthup ïa u nongpynïaid u Shyamkanu Mahanta, u manager u Siddharth Sharma, u nongrwai u Amritprabha Mahanta, u nongtem Shekhar Jyoti Goswami, u Sandipan Garg (DSP), bad ki PSO u Paresh Baishya bad u Nandeshwar Bora.Baroh ki dang hapoh ka judicial custody.

U heh ka SIT, u Munna Prasad Gupta, u la pynpaw kham mynshwa ba ka jingaiti ïa ka charge sheet kan sa plie pat sa ia kawei ka lynnong kaba bud jong ka jingbishar, kaba pynlong ïa ka Assam ban kham jan ban sei madan ïa ka jingshisha kaba don ha lyndet jong ka jingïap jong u Zubeen Garg.