Guwahati, Risaw 27: U Myntri Rangbah ka Assam Himanta Biswa Sarma hynne ka sngi U Blei, u la ban jur ïa ka jingdonkam ban don ka jingïatreilang hapdeng ka Assam, Meghalaya, Tripura, bad West Bengal ban ïarap ïa ki shipai Border Security Force (BSF) ha ka jingïakhun pyrshah ïa ki jingwan buhai shnong ki briew na Bangladesh.
U Himanta u la pynpaw ia ka jingsngewkhia halor ka jingwan tuid jong ki bar Jylla na Bangladesh sha Assam kaba dang ïai bteng, wat hapdeng ka jingpyrshang jong ki shipai BSF bad ki bor Sorkar ka jylla Assam ban tehlakam.
“Ha kine ki ar bnai ba la dep, ki Pulit ka Assam ki la kem ïa ki briew shimet ne ki kynhun kiba ïaid lyngba ïa u pud u sam ka India-Bangladesh jan man la ka sngi,” u la ong.
U Myntri Rangbah ka Jylla Assam ula maham ba khlem ka jingïatreilang, ka jinglong jingman ka lah ban nang sniew shuh shuh haba iadei bad ka jingwan buhai shnong ki nong Bangladesh.
U la kdew ia ka jingdonkam jong ka jingiatreilang kaba jan hapdeng ki Sorkar Jylla bad ki BSF, da kaba kdew ba ka Assam bad Tripura ki la dep ban iatreilang ban lap bad khanglad ia ki nongwan rung beain ki briew na Bangladesh.
U la kyntu ïa ka Sorkar West Bengal ban pynjur ïa ka jingpyrshang ban wad bniah, da kaba ai jingmut ba ka rukom treikam kaba la pynbeit ryntih ban pynkhlain ïa ka jingpahara haki thain khappud jong ka India.
U Himanta u la pynshai ba ka polisi jong ka Assam ka dang long kaba khlem shah liang ïa ka jinglong niam, da kaba ong, “Lada don mano mano ba wan na Bangladesh sha ka ri jong ngi, dei ban lap bad pynkynriah noh ïa ki khlem da kheiñ ïa ka jinglong niam jong ki.”
Ka Sorkar jylla Assam ka dang peitngor bha ha kaba ïadei bad ka jingwan tuid ki briew, da kaba thmu ban pynkhlaiñ ïa ka jingpahara ha khappud lyngba ka jingïatreilang kaba neh bad ki BSF bad kiwei kiwei ki tnad.
U Himanta u la pynpaw ba, ha kine ki ar bnai ba la dep, ka Sorkar Assam ka la ithuh bad pynphai biang ïa ki 138 ngut ki nongwan rung tuh na Bangladesh.
