Guwahati, Jylliew 13: Hapdeng ka jingïakynad iapher jaidbynriew haki thain Dhubri, u Myntri Rangbah ka Assam Himanta Biswa Sarma u la pynmih ia ka hukum ban siat naphang haka por ba pynjari korphiw miet ha Dhubri ka ban treikam naduh mynta ka miet.
Marsien poi ha Dhubri, u Myntri Rangbah u la khot ia ka jingialang bishar kam bad ki heh ophisar bad ki bor synshar district ban lum jingkhein halor ka jinglong jingman hapoh ka thain Dhubri.
Haba kren shaki lad pathai khubor, u Himanta u la ong, “Nga la hukum ban siat naphang ha ka por mynmiet ha Dhubri lada jia ba mih kano kano ka jingiakynad. Ïa kane ka hukum yn pyntreikam tyngeh ha ka sor Dhubri.”
Ka jingbthah siat, ka treikam lada don kano kano ka kam beain, kynthup ka jingkawang maw.
U Myntri Rangbah u la ong ba ia kane ka hukum la pynmih ban pynheh ia ka suk ka sain jong ki paidbah ha ka por myn miet, ha kaba ka jingma jong ka jingshah thombor ka lah ban nang jur.
U Himanta u la ong ba ka don kawei ka kynhun hapoh ka district Dhubri kaba thaw ia ka huri hura bad thmu ruh ban pynjulor ia ki temple.
“Ngin ym shah ia kano kano ka jingpyrshang ban pynjulor ia ki temple. Namar kata nga la hukum ban siat” la ong u Himanta.
U Himanta u la iathuh ba u la bthah ia ki heh Sorkar ba kin long kiba husiar bad ban leh mardor katkum ka jingbthah lada shah tynjuh bor..
“Ka don kawei ka kynhun ‘Joy Bangla’ jong ka ri Bangladesh kaba treikam ha Dhubri. Ngan don hangne ha Dhubri haka por lehniam Eid Bakhri” u la ong.
La iathuh ba da ki hajar tylli ki masi la wanrah ha ka sien kaba nyngkong na West Bengal ban lehniam Eid mynta u snem ha Dhubri.
Ka Sorkar ruh kala pynbun iaki bor pahara kum ki RAF, CRPF bad ki Pulit ha Dhubri ban pynneh ia ka suk ka sain.
U Myntri Rangbah ka Assam, u Himanta Biswa Sarma u la kynnoh ba ïa ka doh masi, la “pynlong atiar” pyrshah ïa ki jaidbynriew Hindu hapoh ka Jylla, hadien bala kynnoh ba don ba bret doh masi ha ki jaka paidbah ha ka por rakhe Eid.
U Himanta u la ong ba katei ka jingleh ka dei ka jingpyrshang ban pynkhih bad beh noh ia ki Hindu na ki jaka ba ia khleh lang.
“Mynshuwa, lada don ki longïing Muslim kiba sah ha ka jaka jong ki Hindu, ki husiar bha ban ym wanrah jingeh. Lada ki kwah ban bam doh masi, kin leh ia kane tang ha ki jaka ba bun ki Muslim. Mynta, ki bret ïa ka doh masi ha ki jaka ba lait, kaba pynbor ïa ki Hindu ba kin mih noh na kita ki jaka,” u la ong.
Haba Rynsan X, u Myntri Sorkar u Ashok Singhal u la ong, “Shoot-at-Sight” ka hukum ha Assam. Ai kti laitluid u HCM @himantabiswa ia ki Pulit Assam hadien ba don ka jingpyrshang ban pyniapher jaidbynriew. Ki khlieh masi & doh masi ba la bret hajan ki temple bad ki iing ki sem jong ki Hindu ha kine ki 2-3 sngi hadien ka Bakrid,”.
“Ki poster kiba pyni ia ka Dhubri kum shi bynta jong ka Bangladesh la iohi. Ka khubor ka long kaba jam & kaba shai bha – ka Assam kan nym shah ia ki kam pyrshah India ne ki kam pyrshah Hindu,” la ong u Singhal.
