Itanagar, Nohprah 08 :Ka MLA seat jong ka Lungla constituency kala kylla thylli noh hadien ka jingkhlad jong u nongmihkhmat jong ka u Jambey Tashi ha Guwahati ha ka 2 tarik u Naiwieng 2022.
Kumta ruh na ka liang ka iingdorbar kala ai ka jingkyrshan ia ka Tsering Lhamu kaba dei ka ZPC barim ka Tawang bad ka kurim jong u tei u nongmihkhmat ba la khlad noh kum ka kyrtong MLA ka ban wan na ka bynta ka samoi kaba dang sah.KaTsering Lhamu ka dei ruh ka ZPC kaba nyngkong eh jong ka Tawang bad ka ban long ruh ka MLA kynthei kaba nyngkong eh jong ka Tawang lada ym don ki ban thep kyrteng na ka bynta ka ilekshon shiteng samoi ka ban wan.Ka Tsering kaba dei ka gold medalist ha ka sobjek histori na ka RGU, mynta ka dei ruh ka Chairman jong ka Women’s Welfare Association ha Tawang.
“Watla ki don ki por kiba sngew shem jingeh, hynrei Nga la ai ka jingmynjur hadien ka jingiai kyrpad na ki paidbah bad ruh ban pynurlong ia ki jingangnud jong u Jamney Tashi,” ong ka Lhamu.
Na ka liang u ZPM ka Lungla Block u Thutan Gombu, u ZPM ka Jemeithang-Dudunghar u Lek Norbu, u ZPM barim u Sang Norbu, u dkhot ka BJP district Core Committee u Jowa Tsering, u nongialam bala rim u Tenzin Phuntsok bad u president ka BJP district ST Morcha u Tsering Tashi ruh kila aijingkren ha kane ka jingialang bad pynpaw ruh ka jingkyrshan na ka bynta ka Tsering Lhamu kum ka kyrtong MLA kaba thymmai.Kine ki nongkren kila pynpaw ruh halor ka jingshemphang ka jong ka ha kaba iadei bad ki kam sain hima sima bad halor ka jingiadei bad ki paidbah ha ki jingtreikam ki jong ka ha ryngkat u kurim ba la khlad noh jong ka ha kine ki 13 snem shiteng ka jinglong MLA na Lungla.
Kham hashwa ka iingdorbar ka la pynlong ruh ka jingduwai na ka bynta ka mynsiem ba la leit noh jong u Jambey Tashi bad leh burom ruh hakhamt ka dur ba la pynieng ka jong u.
Shuh shuh ha kane ka jingialang la ia don lang ruh u dkhot ka National Executive ka ST Morcha (BJP) u Tsetan Chombey, u riew pawkhmat ka Tawang u Tenzin Yendra, ki nongmihkhmat na ki seng samla pule bad ki dkhot na ka PRI.
