Itanagar, Jylliew 24: Ka jingshlei um kaba shyrkhei na ka daw jong ka jingther u slap ba jur ka la lynshop ïa kawei ka projek jong ka NEEPCO ha Keyi Panyor, Arunachal Pradesh ha ka sngi Balang, bad ha kane ka jingjia, kumba san ngut ki briew kila jah rngai, bad 17 ngut bkila mynsaw.
Kane ka jingshlei um ka la lynshop ïa ka NEEPCO Colony kaba don marjan bad ka 43 MW Panyor Hydroelectric Project hadien ba u slap uba jur u la pynlong ïa ka wah Possa ban shlei, ha kaba ka umsaw ryngkat ki jaboh jabaiñ kiba la tuid lyngba ka jaka shong jaka sah. Ki khubor ki pyni ba ym duna ia ka 18 tylli ki iing dara bad ki jingtei ki la shah rong noh ha ka jingshlei um.
Napdeng kiba mynsaw ki don lai ngut kiba mynsaw jur kiba la hap ban kit ha ki jaka ba la shah ktah ha ka jingtwa khyndew hadien ba la twa noh ka lynti ïaid shwa ban pynkit sha Ziro ban ïoh jingsumar.
Ka Rescue operations ka la shah khanglad namar ki jingtwa khyndew kiba la pynlong ia ka jaka ban shah ktah. Ki surok kiba pynïasoh ïa ka distrik sha Itanagar bad Ziro ki dang shah block, kaba pynlong ïa ki nongïarap ban ïaid da ka kjat lyngba ki jaka ba eh ban poi sha jaka ba don kiba lait im. Ka jingpyrshang ban pynpoi ia ki liengsuin ruh ka la shah ktah namar ka jinglong ka suinbneng kaba sniew.
Ki heh ophisar ki la iathuh ba haduh 73 mm ka jinghap slap ha katei ka jaka hapoh 24 kynta, ha kaba ka jinghap slap kaba jur tam ka la jia ha ka por kaba tang katto katne kynta ha ka step jong ka sngi Balang. Ka jingtwa khyndew kaba la mih na kata ka la tep ïa ki bynta jong ki surok hapoh ka dewbilat bad ki mawsiang, kaba la pynthut ïa ka jingïadei bad pynslem ïa ki kam ai jingïarap.
Ki bor pyniaid district, ki SDRF, NDRF, ki pulit, ki heh ka NEEPCO bad ki kynhun sumar ki la pynlong na ka bynta ban wad bad pyllait im.U Myntri Rangbah ka Arunachal Pradesh u Pema Khandu u la pynpaw ïa ka jingsngewkhia kaba khraw halor kane ka jingjia ba sngewsih bad u la pynthikna ba ïa ki lad jingïarap baroh la pynpoi sha ki longïing kiba shah ktah.
Kane ka jingjia ka la pynmih ruh ia ka jingsngewkhia ha ki bynta ba shapoh ka wah ha Assam. Ki bor pyniaid ki la pynmih ia ka jingmaham ba ka jingkiew jong ka um bad ka jingkiew ka jingtuid um na ki jaka ba sharum ka lah ban ktah ia ki distrik kiba kynthup ia ka Dhemaji, Lakhimpur, Biswanath bad Sonitpur ha kine ki khyndiat sngi ban wan.
Da ka jingkheiñ lypa ba u slap un nang jur ha kylleng ka thaiñ, ki bor pyniaid ki la kyntu ïa ki nongshong shnong bad ki jaka ba rit ba kin long kiba husiar katba ki kynhun pynlait im ki dang bteng ban wad ïa kiba jah.
