Dibrugarh, K’Lyngkot 26: Kawei ka ktem jong ki shipai Assam Rifles ha District Changlang jong ka jylla Arunachal Pradesh, ka la shah thombor ha ka step sngi rakhe ia ka Republic Day, ia kaba la suba jur ba ka dei ka kam jong kaikhlaw.
Katkum ki tyllong khubor pahara, la iathuh ba ia ka ktem jong ki shipai Assam Rifles ha Ranglum la thombor ha ka por kumba 8:45 baje mynstep ha kaba la antad ba ka dei ka jingiatreilang jong ki dkhot ka ULFA (Independent) bad ka NSCN (K-YA). Kane ka ktem ki shipai ka don hajan u pud u sam jong ka India–Myanmar, kaba jngai kumba 10 km na Changlang District.
Ki shipai jong ka Assam Rifles marmar ki la pynphai kylla da kaba siat sha ki kaikhlaw hadien katei ka jingshah thombor. Haduh mynta ym shym la don kano kano ka jingmynsaw na ki arliang mamla, la iathuh ki tyllong khubor.
Hadien katei ka jingjia, la pynkhlain shuh shuh ia ka jingpahara ha kylleng ki jaka khappud jong ka District.La pynlong ruh ia ka joint search operation hapdeng ki bun tylli ki tnad pahara ban lap ia ki nongthombor.
Ki heh sorkar ki dang buddien bha ia katei ka jingjia katba ka jingtohkit ka dang iaid shakhmat.
