Dibrugarh, Naiwieng 12: Ka sorkar jong ka jylla Arunachal Pradesh ha ka sngi Balang kala sospon noh ia saw ngut ki heh ophisar sorkar halor ka jingshah kynnoh ba donkti ha ka kam thok ban shim jaka kaba heh bha ha East Kameng district.
Kine ki heh ophisar ki kynthup ia u Deputy Commissioner u Himangsu Nigam (IAS), u DFO u Abhinav Kumar (IFS), bad lai ngut ki Head Of Department (HODs) kiba la shem ba ki donkti ha katei ka kam thok ban shim jaka.
Ka sorkar jylla pan jingmynjur na ka Ministry of Home Affairs (MHA) ban sospon ia u DC Himangsu Nigam.
“Kane ka jingshim jaka kadei na ka bynta ban shna ia ka Frontier Highway Road na Lada shaduh Sarli Pkg-I, II, III, IV & V naduh Chainage 0.00 KM haduh 125.55 KM la sdang katkum ka shithi pan jingbit da ka Requiring Body ia kaba la pynmih ia ka jingpynbna katkum ka RFCT LARR Act, 2013 bad ia ka Ground Verification Board la thaw ha ryngkat bad kine ki dkhot u Himanshu Nigam, IAS, Deputy Commissioner-Chairman, u Abhinav Kumar,IFS, DFO- Member, Miram Perme, DAO- Member, C.K. Tayum, DHO- Member, Takam Kechak, DLRSO- Member Secretary. Halor ka jingai jingmynjur jong ka Board, la ioh ia ka jingmynjur na ka sorkar bad ia ka pisa ka la thep sha u DC, East Kameng District ha ka 17 tarik u bnai Iaiong 2025,” ong ka kyrwoh khubor ba la pyllait da u A.K. Singh, secretary of Department of Land Management, jong ka sorkar Arunachal Pradesh.
Shuh shuh kala kdew ruh, “Ha ka por ba siew ia ka bai lutksan, la don shibun bah ka jingujor ba la ioh pdiang.Ki jingujor ba la ioh pdiang na ki trai jaka kaba kila kynnoh ba ki bor pyniaid district kim shym la leh ia ka sor jamin na ka bynta katei ka kam.
“La kynnoh ruh ba kam shym la don satia ban leh ia ka sor jamin ban shim jingkhien ia ki jaka puta bad ia ki jingdon jingem.Shuh shuh la pynpaw bay m shym la thaw satia ia kata ka multi-disciplinary committee ka ban kynthup ia ki ophisar na ka tnad Forest, Horticulture, Agriculture bad na ka tnad PWD na ka bynta ban pynshisha lang ne ka Joint verification.La kynnoh ruh ba ki bor pyniaid district kila pyniapher bad ka bym iahap ha kaba iadei bad ka jingsiew bai lut ksan.La kynnoh ba ki trai jaka bad ki long iing kiba shah ktah kim shym la ioh satia ia ka bai lut ksan, katba ka bai lut ksan bym iahap ba dep ban ai na ka bynta ki mar ki mata bad ki briew,” la ong u Singh.
La don ruh ka jingkam ba ia ki jaka bad ki mar ki mata jong ki katto katne ngut ki long iing kiba la shah ktah, la shah pynduh noh na ka jingai bai lutksan bad ia ka jingeh jong ki ym shym la pynbeit da ki bor pyniaid district.
Katkum ka jingong ki nongujor, ym shym la ai Notice kaba biang sha ki longïing kiba shah ktah ha ka por ba jurip ne sor jamin bad ia ka por na ka bynta ki jingkam trai bad jingpyrshah.Kumjuh ruh ia ki jingtip ba bniah jong ka jingsiew bai lutksan ym shym la pynpaw sha ki paidbah.
“Ka jingujor ba la ioh na ki trai jaka ka long kaba sngewkhia namar ba la kynnoh ba ki khlem da pynlong ia ka sor jamin ne ka survey ha kaba iadei bad ka jaka ne ia ki khyndew bad kumjuh ruh ka jingbym iahap bad ka jingsiew bai lut ksan bad kane ka jingleh ka ai jingmyntoi tang ia ki katno katne ngut bad pynduh ia kiwei pat.Ha kaba iadei bad kane jingujor, ka sorkar kala dep ban thaw ia ka Fact-Finding Committee (FFC) vide Order No. LMD-13011/34/2023 kaba la pynmih ha ka 13 tarik u Nailar 2025 hapoh ka jingialam u Chairmanship of Commissioner (Transport) ryngkat bad u Chief Engineer PWD Highway, Director Land Management, Conservator of Forest, Director Agriculture, Director Horticulture, Director Fisheries bad DLRSO HQ kum ki dkhot ka FFC,” u la ong.
Shuh shuh u la bynrap, “Ia ka Fact-Finding Committee la ai por 30 sngi ba kin aiti ia ka report naduh ba la pynmih ia kane ka hukum, katkum kane ka FFC kala sdang ia ka jingtohkit da kaba khot ia ki nongkam trai bad kiba pyrshah na ki trai jaka bad ruh kila leit ban jurip ia ki jaka.Halor ka jingkyrpad ka FFC kala pynjlan biang ia ka por haduh ka 30 tarik mynta u bnai Naiwieng ba kin aiti ia ka report ba khatduh,”.
“Ka FFC ka la aiti ïa ka interim report sha ka Sorkar Jylla ha ka 4 tarik u Naiwieng 2025 kaba pynpaw ba la bishar bniah ïa ki mar ki mata ki bym don na ka bynta ban siew bai lutksan, bad la lap ruh ïa ka jingleh bakla na ka bynta ban thew bad who, ka jingkhein jingdiah kaba thok.Ka interim report jong ka FFC ka pyni ïa ki jingduna bad jingpynbna kiba jur da ka kynhun ba leh ia ka joint field survey.Katkum ka jinglap ka interim report jong ka FFC la lap ia kiba bun ki bym iahap, ia ki dkhot jong ka board members la sospon noh mardor,” ong u Singh.
