Itanagar, Nohprah 13: Ka Sorkar Arunachal Pradesh kala khein kongsan ia ki ktien ki thylliej jong ki paid riewlum ka Jylla bad kala pyrshang mynta ban buh noh da ki jingthoh ia ki ktien bapher bapher jong ka Jylla khnang ba ki Khun ki Kti kin ioh ia ki jinghikai ia ka ktien lajong bad ba kin bat iala ka jong ka tynrai.
Haba iakren bad ki nongthoh khubor, u Myntri Rangbah ka Arunachal Pradesh Pema Khandu ula kyntu ia ki samla ka Jaidbynriew Monpa bad Khampti, kiba don ia ki kot ba thoh da ka ktien jong ki hi, ba kin pule bniah bha ia ki.
U Khandu ula ong ba ki Monpa bad Khamti, kiba dei ki Buddhish ka Mahayana bad Hinayana Sect, ki don iala ki jong ki kot ba thoh da ka ktien jong ki hi.
Katba ki Monpa ki im ha Tawang bad West Kameng District ha ka thain sepngi ka Arunachal Pradesh, ki Khamti ki sah ha Namsai District ha lam mihngi jong ka Jylla ba markhap ka Assam.
“Ka Sorkar Arunachal Pradesh kala kut jingmut ban pynneh bad iada ia ka kolshor bad ka ktien ka thylliej jong baroh ki paid riewlum kiba don hapoh ka Jylla” ong u Khandu.
Ula bynrap “Ki Khamti bad Monpa ki donbok palat ban don iala ka jong ka kot bala thoh ha ka ktien lajong, ia kiba la hikai mynta ha ki skul. Ngi la pyrshang ban iatreilang bad kiwei ki jaidbynriew riewlum ba kin buh jingthoh lang noh iala ki jong ki ktien ki thylliej”.
“Kiwei ki jaidbynriew ki lah ban pyndonkam da ki dak roman ban hikai iala ka ktien ka thylliej sha ki Khun ki Kti khnang ba kin iai bat iala ka jong ka tynrai” ula ong.
