Itanagar, Jymmang 9: Ki paidbah nongshong shnong kila ia tuid hynne ka sngi Thohdieng sha ka rally ba la ai kyrteng ‘United Peace Rally’, ban pyrshah ia ki kam kaikhlaw ha Longding, Arunachal Pradesh.
Ia kane ka rally la lam khmat da ka Wancho Council ha kaba baroh ki dkhot jong ka jaitbynriew Wancho kum ka Wancho Wangham Council, Longding District Students Union, ZPCs bad ZPMs, Gaon Burahs, Market Welfare Association of Longding, Kanubari, Pongchau, Tissa bad ka Wakka nalor kiwei pat kiba la ia shim bynta.
Da ki spah ngut ki briew kiba don ha ki rta bapher bapher kila wan ban ia shim bynta ha kane ka rally da kaba rah lang ia ki banners bad ki placard, kiba pynrem ia ki kam pyntriem jong ki kaikhlaw ba kynthup ia ki kam rahbor, dawa pisa bad ka jing pyniap klep.
Ia kane ka rally la sdang na ka iew Longding bad la iaid lynngba ka sor bad pynkut hakhmat ka Ophis u Deputy Commissioner. Ki nongmih khmat na ki seng bad kynhun bapher bapher kila ia kynduh ia u DC u Bekir Nyorak bad dawa ha khmat jong ka sorkar bad ki bor pyniaid district ba kin shim ia ki sien jam ban pynduh jait ia kam pyntriem jong ki kaikhlaw ha baroh kawei ka district.
Ki paidbah kila kren pyrshah ia ki kam pyntriem jong ki kaikhlaw da kaba ong ba kila kylla langknia hapdeng ki kaikhlaw bad ki bor pahara.
Lah ban kdew hangne ba naduh u snem 2018 kila don haduh 90 tylli ki case jong ka jingshah rahbor ki briew ba lui lui ha ki seng kaikhlaw bapher bapher tang ha Longding district wat lada ka ain AFSPA ka trei kam hapoh ka district.
