Guwahati, Iaiong 01 : Haduh 133 ngut ki kyrtong kin iakhun ia ka elekshon MLA na ki 50 tylli ki constituency jong ka Jylla Arunachal Pradesh.
Ka Bharatiya Janata party (BJP) kala pynieng kyrtong ha baroh 50 tylli ki constituency katba ka congress kala pynieng tang na ki 19 tylli ki constituency.
Ka BJP kaba don ha ka liang synshar kala jop lupa ia 10 tylli ki sear na ka Iingdorbar ba 60 ngut ki dkhot. Napdeng kine kiba la jop lypa ki dei u Myntri Rangbah ka Jylla Pema Khandu bad arngut ki kyrtong ba dang mih thymmai- Ratu Techi na Sagalee bad Hage Appa uba iakhun na Ziro-Hapoli seat.
Ka BJP kala pynieng haduh 14 ngut ki kyrtong ba dang thymmai katba ka NPP kala pynieng ia 16 ngut ki kyrtong ba dang thymmai.
Ka BJP kala pynieng haduh 4 ngut ki kyrtong kynthei katba ka congress kala pynieng ia 3 ngut. Ki don ruh ki kyrtong kynthei ba shimet.
Ha kawei ka khubor, haduh 14 ngut ki kyrtong kin iakhun ia ka elekshon Lok Sabha na ki artylli ki constituency jong ka Jylla. Phra ngut kin iakhun na Arunachal West constituency bad hynriew ngut kin iakhun na Arunachal East constituency.
Haduh 8,86,848 ngut ki don ki nongthep vote ha kine ki artylli ki elekshon.
Ka Jylla kan leit sha ka elekshon ha ka 19 tarik Iaiong bad ka jingniew ia ki vote jong ka elekshon MLA kan long ha ka 2 tarik u Jylliew.
