Itanagar, Naitung 20: Palat 15 ngut ki briew kila duh noh ia la ka jingim bad da ki spah ngut kila shah pynkynriah na ki iing ki sem namar ka jingther ba khlem sangeh jong u slap kaba la wanrah iaka jingshleium bad ka jingtwa khyndew ba jur bha ha ka jylla Arunachal Pradesh ha kine ki khyndiat sngi ba la leit.
Ki surok ha ka thain jong ka Lower Siang district kila ngan bad dkut namar ka jingther palat u slap ba jur bad kila don ruh ki jingtwa khyndew ha Siji, Yate, bad hajan jong ka shnong Garu.
Ka surok Aalo-Likabali ia kaba la niew ba kadei ka budlum na ka bynta ki district kum ka West Siang, Leparada, Shi-Yomi, bad Upper Subansiri ki dang sahkut haduh mynta.
Katkum ki report, ka jingslap ba khlem sangeh kala pynlong ban duh noh ia 15 ngut ki mynsiem briew ba kordor bad da ki spah ngut ki briew kila shah pynkynriah ki long iing bad baroh kiba la shah ktah ki long haduh 36,000 ngut ki briew ba ki 26 tylli ki districts.
Ka East Kameng bad ka Upper Subansiri kadei ka thain kaba la shah ktah bha bad ka jylla mynta ka don hapdeng ka jingpeitngor bha. Ki heh ophisar kila kyntu ia ki paidbah nong shong shnong ba kin kiar na ka leit jingleit ha ka por mynmiet namar ka jingma na ka jingtwa khyndew.
Na ka liang uMyntri Rangbah ka jylla Arunachal Pradesh u Pema Khandu u la pynpaw ka jingsngewlem ba khraw sha kiba ha iing ha sem kiba la buh noh ia la ki ieit ba thoin kiba la khlad bad u la pynbna ruh ban siew 4 lak marwei ia kiba la duh noh ia laka jingim katkum ki kyndon jong ka sorkar.
