Shillong, Naitung 19 : Ka Meghalaya State Commission for Women (MSCW) kala shim case suo moto halor ka jingshah pyniap ba dang shen jong kawei ka khynnah ha Williamnagar, East Garo Hills.
Ha ka kyrwoh bala pyllait ha ka sngi Saitjain, ka MSCW kala ong “ Ngi sngewsih jur ia ka jingjynjar bala mad da ka lanot bad phah ia ka jingsngewlem sha ki bahaiing hasem jong ka. Kum kine ki kam thombor kiba shyrkhei ki dei ki bym lah ban shah bad ka pyni ia ka jingthombor beit beit ia ka jinglong ba kyrdor jong ka jinglong briew bad ka hok kaba ka imlang sahlang jong ngi ka bat”.
Ka Commission kala ban jur ba ia u nongleh ia kane ka kam bymman dei ban kem noh khlem ka jingpynslem bad ban pynngat ha ka ain lyngba ki kyndon kiba khlain tam jong ka ain.
“Ngi kyrpad ia ki Pulit ka Meghalaya bad baroh ki bor ba dei khmih ba kin shimkhia hakhmat eh ia ka jingtohkit, pynthikna ia ka jingtreikam kaba shai bad ban pyntip sha ki paidbah ia kiei kiei kiba jia ba man” kala ong haba kyntu ia ki shnong ki thaw, ki seng bapher bapher bad ki nongshong shnong ba kin ai ka jingiatreilang ba pura bad ki bor tohkit khnang ban pynthikna ka jingbishar ba hok kan kloi”.
“Haba ithuh ia ka jingkhia bad jinglong kyrkieh ka jinglong jingman, ka MSCW kala shim sio moto ia kane ka case. Ka Commission kan buddien laitluid ia ka jingiaid jong ka jingtohkit” kala ong.
Ka Commission kala kular ruh ba kan tuklar, lada donkam, ban pynthikna ba ki bahaiing ka lanot kin ioh ia baroh ki jingkyrshan bad jingiarap kiba donkam.
