Itanagar, Jylliew 11: Ki paidbah nong shnong jong ka shnong Chatong, Arunachal Pradesh kaba hap hapoh ka Longding district, kila hap ban ia mih paidbah ban shna hi ia ka jingkieng dieng namar ka jingshah iehbein ha ka Sorkar.
Kumba shi spah ngut ki nongshon shnong na ka shnong Chatong bad kumjuh ruh kiwei ki shnong ba marjan ba kynthup ia ka shnong Ozakho, Langmai, bad Chajam kila ia mih lang ia synniang lem ia ka pisa ban shna ia kane ka jingkieng da ka bormet namar ka jingshah ieh khun swet ha ka sorkar. Ki kynthei na ki shnong ki la kyrshan ia kane ka jingpyrshang da kaba pynkhreh ia ki jingbam bad ai sha ia ki shynrang kiba trei ha katei ka jingkieng.
Ka shnong Chatong ka don ha ki bynta jong ka thain mihngi jong ka jylla Arunachal Pradesh kaba dei ruh ka jaka ba shong basah da ki jaitbynriew Wancho. Wat lada kane ka shnong ka dang dei ka bynta jong ka jylla Arunachal ia kaba la iohi ia ka jingkiew sted ha ki liang baroh ha kine ki khyndiat snem, phewse kine ki shnong ki dang mad bad kynduh jingeh khamtam eh ka por slap namar ka jingbym don ka surok bad ki jingkieng.
“Ki don ar tylli kisurok kiba pyniasoh bad kine ki shnong bad kawei kadei jong ka surok PMGSY kaba iaid lyngba ka Chibam block, ka long ka ym lah satia ban iaid kali,” ong u Jacob Wangsu, uba dei u President jong ka Chatong Students’ Union. “Ki paidbah kim banse ban iaid da ka lynti kaba jngai kaba jngai kumba 40 km bad kaba hap ban iaid lyngba ka Tirap district ban poi sha Longding, kaba dei ka district headquarters.”
Da ka jingsngewbitar namar ka jingshah ieh khun swet namar ka jingleh mynthi jong ki bor ba dei khmih, ki paidbah nong shong shnong kila shim noh ia kane ka rai. “Ka shim por ia ngi kumba lai sngi ban pyndep ia kane ka jingshna namar ba ka sorkar kam shym la leh eiei, ki paidbah paidbah ki hap ban leh hi” ong u Wangsu.
Kane ka jingkieng thymmai la khmih lynti ba kan pynsuk ia shibun ha ka leit ka wan ki nongshong shnong bad kan pynbha ruh ia ka lad ban ioh ia ka koit ka khiah, ka jingpule, bad ki iew ki hat na ka bynta ki 500 tylli ki longing ha katei ka thain. Baroh saw tylli ki shnong ki hap hapoh ka Kanubari Assembly constituency, ia kaba la mih khmat da u myntri sorkar u Gabriel D. Wangsu.
