Itanagar, Rymphang 08 : U Myntri Rangbah ka Arunachal Pradesh Pema Khandu bad ki kynhun bapher bapher ka Manipur kynthup ka COCOMI, kila ai ka jingiaroh ia ka rai jong ka Sorkar Pdeng ban ker sainar noh ia ka khappud India-Myanmar.
Kane ka jingkyrshan jong u CM ka Arunachal kala mih hadien ba ka Eastern Naga Peoples Organisation (ENPO) lem bad bun kiwei kiwie ki Seng, kila pyrhsha ia kane ka rai jong ka Sorkar Pdeng.
Haba iakren bad ki nongthoh khubor, u Pema Khandu ula niew ia kane ka rai kum ka sienjam kaba khraw bad ha ka lynti kaba dei namar kan ai jingiara ia ki artylli ki Ri ba don marjan. Ula ai khublei ruh ia u Myntri Rangbah Duh Narendra Modi bad Myntri kam Pohiing Amit Shah halor ka jingpyntreikam ia ka rai ban ker ia u khappud ka Myanmar.
Ha kajuh ka por, u Myntri Rangbah ka Manipur N Biren Singh ruh ula ai khublei ia u Myntri kam Pohiing halor ka rai jong ka Sorkar Pdeng.
U Nongaiktien ka COCOMI Khuraijam Athouba ula pynpaw ia ka jingsngewhun ia kane ka rai ka Sorkar Pdeng bad ong ba ka dei ka rai kaba donkam shaba palat.
Ka rai jong ka Sorkar ban ker sainar noh ia u khappud ba 1643 Km ka India-Myanmar kan pynkut noh ia ka jingpyndonkam bakla ia ki jaka khappud bad pynkut ruh ia ki kam beain jong ki kynhun kaikhlaw kiba ju pynkhein bunsien ia ka soskular Free Movement Regime jong ki artylli ki Ri.
Kham hashuwa kane, u Myntri Rangbah ka Mizoram Lalduhoma ula ong ba ka Sorkar jong u kam don satia ia ka bor ban khang ia ka Sorkar Pdeng bakan pynieng ia ki sainar ha khappud ka India-Myanmar bad ban pynkut noh ia ka FMR hapdeng ki artylli ki Ri, hynrei kum ka Sorkar kan pyrshah ia kane ka sienjam.
