Itanagar, Iaiong 22 : Ka Election Commission of India (ECI) kala hukum ban pynlong biang ia ka jingthep vote ha ki phra tylli ki Polling Station ka Arunachal Pradesh ha ka 24 tarik Iaiong.
La hukum ba ia kane ka jingiathep vote biang, dei ban pynlong naduh ka por 6 baje mynstep haduh 2 baje janmiet, ong ka kyrwoh na u Deputy Chief Electoral Officer Liken Koyu.
Kane ka hukum kala mih hadien ka jingioh khubor ia ka jingkulmar bad jingpynpra ia ki EVM ha ka sngi thep vote kaba long ha ka 19 tarik Iaiong, kaba dei ruh ka sngi ba pynlong ia ka elekshon MLA.
Kine ki Polling Station bala ithuh ban pynlong biang ia ka jingthep vote ki kynthup ia ka Sario kaba hap hapoh ka Bameng Assembly constituency, Longte Loth kaba hap ha Nyapin Assembly seat, Dingser, Bogiya, Siyum, Jimbari bad Lengi kiba hap hapoh ka Nacho constituency.
Nalor kine, ka Bogne bad Lolom Polling booth ruh kiba hap hapoh ka Rumgong Assembly constituency kin don biang ia ka jingthep vote thymmai.
Haduh 76.44% ki nongthep vote n aka 8,92,694 ngut kila thep vote ha ka 19 tarik Iaiong ban jied ia ki 50 ngut ki MLA ha ka iing ba 60 ngut ki Dkhot.
Ka BJP kala dep ban jop lypa haduh 10 seat khlem kano kano ka jingialeh pyrshah.
