Itanagar, K’Lyngkot 7: U Myntri Rangbah ka jylla Arunachal Pradesh u Pema Khandu u la bthah ia ki bor pyniaid district ban wad bad ban pynpra ia baroh ki jingtei beain jong ki jingtei jong ki jaka leh niam ha Itanagar.
Ia kane ka rai la shim hapdeng ka jingiakhih kaba nang jur jong ki kynhun samla trai ri ne ki (indigenous youth groups) halor ka jingkynnoh ba kila wan rung tuh da ki nongwan buhai shnong beain.
Haba kren sha ki lad pathai khubor, u Khandu u la ong, “Nga la bthah ia ki deputy commissioner ban ithuh ia ki jaka bad pynpra ia baroh ki jingtei niam bym don jingbit ha ka nongbah jong ka jylla”.
U Khandu u la ban jur ba ka jylla Arunachal Pradesh ka shah kdup hapoh ka ain Inner Line Permit (ILP) jong ka Bengal Eastern Frontier Regulation (BEFR), 1873, kaba pynbeit ia ka jingrung jong ki bym dei ki nongshong shnong ban iada ia ki jaidbynriew trai ri trai muluk, ka khyndew ka shyiap, bad ka jinglong tynrai jong ka riti dustur.
U la pynbna ba ka sorkar jylla ka pyntreikam ia ka Digitized ILP system ban pynkhlain ia ki jingkhynra ia ki briew kiba wan rung bad sah beain.
“Kham mynshwa, ym shym la lah ban buddien bha ia ka rukom pyntreikam ia ka ILP. Mynta ngi la kynriah noh sha ka digital platform.Hadien ba la mynjur da ka kynhun myntri sorkar, ki kyndon ba thymmai kin sa treikam”, u la ong.
Ka jingsngewkhia halor ka jingwan buhai shnong be-aiñ, u CM u la pynpaw biang ïa ka jingkular jong ka sorkar ban pynkhlaiñ ïa ka jingpyntreikam ïa ka ILP bad ka jingteh lakam ha ki khappud,katba u pynthikna ba baroh ki lad ki lynti kin sah hapoh ki kyndon aiñ bad ka riti synshar ka ri.
Ha kine ki khyndiat bnai ba la dep katto katne ki seng trai ri trai muluk, kiba kynnoh ba ki nongwan buhai shnong be-aiñ ki shna ïa ki jaka mane khlem jingbit bad ki nongwan rung tuh ha ki jaka jong ki riewlum ha ka ICR. Ka seng ka la pynlong katto katne ki prokram pyrshah bad ka la kyntu ia ka sorkar ban shim khia mardor ban pynpra ia ki jingtei.
