Shillong, Jymmang 29: U Myntri bad Nongaiktien ka Sorkar MDA Bah Paul Lyngdoh hynne ka sngi Palei ula ong, watla ka jylla kala pynkhreh bha ia ki kot ki sla ha kaba iadei bad ka jingiakren pynbeit pud bad ka Sorkar Assam, hynrei kala don pat ka jingkhmih lynti ba kin ym pat lah ban shim ia kano kano ka rai kaba heh namar ba ka jingdon jong ka elekshon ha jylla Assam.
Haba iakren bad ki nongthoh khubor, u Bah Paul Lyngdoh ula pyntip ba ka kaiphod jong ka komiti ha kaba iadei bad ka jingiakajia pud ka dei kaba kila dep ban pynkhreh la slem bha bad kaba sah ka long sa tang ba kin ia leit lang ban jurip ia ki jaka. Ula kdew ba ka jingpynsngew na ka liang ka Assam kam long kaba sngewbiang, namar ba dang shen kila pynlong ia ka elekshon Panchayat bad kan sa long ruh sa ka elekshon jong ka iingdorbar thawain ka jylla Assam.
“Ka komiti kala dep pynkhreh ia ka kaiphod. Baroh kaba sah mynta kadei sa tang ban leit jurip lang ia ki jaka kiba shah ktah khamtam eh ha Langpih. Hynrei na ka liang ka Assam lehse ka lah ban dei namar ka elekshon Panchayat bad ka elekshon sha ka iingdorbar thawain ban sa wan, kim kwah ban shim ia kano kano ka rai kaba lah ban ktah ia ki ktem kaba ki ioh jingkyrshan” ula ong.
Ula kubur ba watla ka jingiakren hapdeng ki Myntri Rangbah ka Jylla Meghalaya bad Assam kan sa long noh shen, hynrei kan ym don pat kano kano ka jingkhmih lynti ba kin shim ia ka rai kaba kongsan tad haduh ban da la pyndep lut ia ka elekshon.
“Ha ka jingshisha, ki kaiphod ki jong ngi ki dei kiba lah biang. Kadei sa tang ka jingleit jurip lang sha Langpih, ia kaba ngi lah mynjur ha ka jingiakynduh kaba khatduh kaba la long ha Hotel Pinewood. Kane kam pat urlong namar ka kam sain pyrthei” ong u Bah Paul Lyngdoh.
Haba kylli ia ka jingiakren kan sa long noh shen, ula pynthikna da kaba ong, “Ka jingiakren kan sa sdang biang, hynrei ngim don pat ia kano kano ka jingkhmih lynti ia kaei kaei kaba heh ne kyrpang ban jia hashwa ban kut noh ki kam kiba iadei bad ka elekshon”.
