Shillong, Naiwieng 14 : U Symbud Myntri Rangbah ka Jylla ba khmih ia ka Tnad kam pohiing Bah Prestone Tynsong hynne ka sngi Ba-ar, ula ong ba ka Sorkar ka dang ap ia ka rai jong ka Hynniewtrep National Liberation Council (HNLC) halor ka ingkyrpad ba ki Nongialam ka seng kin wan noh dalade sha ka jingiakren iasuk ban wan.
Haba iakren bad ki nongthoh khubor, u Bah Prestone ula ong “Nga ban biang sa shisien ba ka Sorkar Jylla bad ka Sorkar Pdeng ki ieng skhem bad kwah eh ban pynbteng ia ka jingiakren bad ka HNLC”.
“Bad ngi dang ap ia ka jingaiktien na ki (HNLC) namar naba ki Nongialam ba hakhlieh kim pat wan satia ban iashimbynta ha ka jingialang. Kumta ngi la phah leit phai iaki (dkhot ka HNLC) ha ryngkat ka jingkyrpad bad ka jingkyrpad jong ngi ka long ba ynda kila long kiba la khreh ba kin sngewbha pyntip sha ngi namar kum ka Sorkar Jylla bad Sorkar Pdeng ki dang ap ban don biang ka jingiakren” ula bynrap.
U Bah Prestone ula ong “ Ia mynta hi, ka jingiakren ba pura (official) kala long tang shisien bad phi tip ruh ba kane ka jingiakren ka dei tang bad ki nongialam ba hap ha ka kyrdan Second Rank. (Kumta) ngi kyrpad ba ha ka jingialang ba-ar ne ba lai, ki nongialam ba hakhlieh duh ki dei ban iadonlang bad ngin sa wad ia ki lad ki lynti ban leh eiei halor kino kino ki kam bala iakren halor ka miej”.
