Nongpoh, Naiwieng 14 : Ka Tamasa Amur Falcon, ka tamasa ban pyni nam ia ka jaka shongthait jong ki sim Amur Falcon sha ka pyrthei ha ka shnong Tyrso, Ri-Bhoi District, kala sdang hynne ka sngi Ba-ar bad kan neh haduh laisngi kynthih.
Da ki phew hajar tylli ki sim Amur Falcon kila wan poi ha ka shnong Tyrso-Umru dang ha kine ki sngi bala leit noh. Kine ki sim ki dei kiba wan her ne krih jaka (migrate) na Siberia bad Northern China namar ka tlang bad ki dei kiba leit her shaduh ki bynta ba shathie bad mihngi jong ka African Coast.
Ia kane ka tamasa bala pynlong da ka Tyrso Valley Wildlife Protection Society (TVWPS) la plie paidbah da u Myntri ka Tnad Animal Husbandry ka Jylla Bah A.L.Hek.
Ia kane ka tamasa la kyrshan da ka Seng Samla Shnong Tyrso Pyllun, ka ka Iakyrshan Farmer producer Cooperative Society. Ka FKJGP North Khasi Hills, ka CoRP, bad kiwei kiwei.
Haba kren kum u kongsan, u Bah AL Hek, u la pynpaw ia ka jingkmen kaba khraw ban ioh ban sakhi dalade ia kane ka tamasa kaba kham pher hapoh ka jylla Meghalaya kaba la pynlong kyrpang ban ai nam ia ka jingwan iuhkjat jong ki sim Amur Falcon kiba wan na kiwei pat ki ri ban her da ki phew hajar kilometer bad ban wan shongthait shipor ha kane ka thain Tyrso hashwa ba ki her pat sha kiwei kiwei ki jaka bad ban leit phai sha ka jaka ba ki long trai.
Kum u Myntri ka sorkar jylla, u la ai ruh ia ka jingiaroh ia ki nongialam ka TVWPS lem bad kiwei kiwei kiba la shimkhia ban pynlong ia kane ka tamasa kaba kham itynnad kaba long ruh kum ka jinghikai ia kiwei kumno ban burom lem ia ki mrad ki mreng bad ki sim ki doh ban kiar na ka jingpyniap pathar ia ki kaba lah ban wanrah ia ka jingduhjait jong kum kine ki mrad khyllah.
Na ka liang ka TVWPS ka la aiti ia ka dorkhas ha u Myntri ka Sorkar jylla ba kyrpad ba un tuklar lem ha kaban pynioh noh ia ka jingithuh ia kane ka tamasa da ka Sorkar nalor ban pynurlong ia ki jingdonkam jong ka seng bad ka shnong ka thaw.
