Shillong, Kyllalyngkot 29: U Symbud Myntri Rangbah ka jylla u Bah Prestone Tynsong, hynne ka sngi ula ong, ba ka Sorkar ka iengskhem ha ka nongrim ban pynkynriah noh ia 342 tylli ki longiing kiba sah ha Them Metor sha ka jaka jong ka Sorkar.
Haba iakren bad ki nongthoh khubor, u Bah Prestone Tynsong ula ong ba ka sorkar kala dep ban pyntip sha ki nongialam jong ka Harijan Panchayat Committee (HPC) bad ki nongialam jongka Delhi Gurudwara na ka bynta ban pynlong biang iaka jingiakynduh ban iakren halor katei ka mat.
“Ngi la dep ban pyntip ia ka por bad ngi dang ap ban ioh ia ka jingpyntip naka liang ka jongki” ong u Bah Prestone.
Ula ong,“Shisien ba kila pyntip ia ka por, ngin sa pynbeit thikna iaka tarik bad ngi kwah ba ngin lah noh ban pynbeit kham kloi ia kane ka kam”.
Kumban shu pynkynmaw ka sorkar jylla kala iakynduh bad ki nongialam jongka HPC bad Delhi Gurdwara ha ka 7 tarik u Nohprah 2023 bad ha kane ka jingialang ka sorkar kala shim ia ka rai ban tei iaka iing ha ka jaka kaba don 2.4 akar hynrei namar ba kam pat long kaba biang kumta ka sorkar kala rai ban ai sa 1.4 akar kaban long baroh 3 akar tam na ka bynta ki 342 tylli ki longing.
Na ka liang ka HPC kala pynpaw ba ka jingtyrwa ka sorkar kala long kaba biang hynrei kin leit ban pynsngew shwa ia ka rai kaba la shim ha ka jingialang, sha baroh kiba shong basah ha Them Metor.
