Shillong, Jymmang 11 : Ka Meghalaya Regional Committee ka West Jaintia Hills sector, kan pynbteng biang ia ka jingia kren pynbeit pud tad hadien ka jingthaw Sorkar thymmau ha Assam bad jer kyrteng ia u Chairman ka Regional Committee ka Jylla, ong u Symbud Myntri Rangbah Bah Sniawbhalang Dhar.
‘Ai ba ka Sorkar Assam kan thaw shuwa ia ka Sorkar bad ngin sap hah sha ngi ia ki kyrteng ba mano ki ban long ki Chairman ba thymmai jong ki Regional Committee” ong u bah Sniawbha uba long u Chairman ka West Jaintia Hills Regional Committee.
U Bah Sniawbha ula pyntip ba ka Sorkar Meghalaya kala dep ban pynkhreh ia ka kaiphod halor ka Block-I, kaba dei kawei na ki jaka iakajia ba dang sahteng ban pynbeit, hynrei ia kane ka kaiphod ym pat shym la aiti satia.
“Ka kaiphod ka dang don bad ki (bor district) hynrei kin dang ban aiti ia ka namar ngi la bthah ia ki ba kin buh shuwa kumba ka long” ula ong.
U bah Sniawbha ula ong “Lehse haba kut jong une u bnai, Ngan sa bthah iaki ba kin aiti ia ka kaiphod sha ka Sorkar Jylla bad ngin sa leh ia kaba donkam hadien ba ka Assam kala thung ia ki Chairman ba thymmai na ka liang jong ka”.
Haba kylli halor ka jingleit jurip lang ia ki Shnong ba hap hapoh Block-I, u DyCM ula ong ba ia ka sngi yn sa iashim rai lang da baroh arliang. “Ngin sa iapeit bad iakren ia kane ka kam bad baroh artylli ki Sorkar” ong u Bah Sniawbha.
Haba kylli, ula iathuh ba ka jingiakynad ha ka thain Khanduli-Lapangap kala kham jai jai mynta hadien ka jingialang jong ki bor district.
“Tang mar syn dep ka elekshon bad la pynbna ia ka result, bad wat ha kine ki arsngi-laisngi bala leit, ha ka 5 tarik Jymmang, kala don ka jingialang hapdeng u Deputy Commissioner ka West Jaintia Hills bad Deputy Commissioner ka Karbi Anglong District ha ka jingiadonlang ki Nongialam Shnong ka Khamduli bad Lapangap” ula ong.
“Kila iabeit ia mynta shipor bad ka jinglong jingman hi kala jai jai” ula bynrap.
